قازاقستان پراۆوسلاۆ شىركەۋىنىڭ باسشىسى «پاراسات» وردەنىمەن ماراپاتتالدى
بۇگىن، 6 نان 7- قاڭتارعا قاراعان ءتۇنى الماتى قالاسىنداعى ۆوزنەسەنسكي كافەدرالدى سوبورىندا حريستيان الەمىنىڭ باستى مەرەكەسى روجدەستۆوعا وراي سالتاناتتى شارا ءوتتى. وندا قازاقستاندىق جانە استانالىق ميتروپوليت الەكساندر ءمىناجات ەتۋ ءراسىمىن وتكىزدى.
ۆوزنەسەنسكي سوبورىنداعى شاراعا قاتىسقان ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ، قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ روجدەستۆو مەرەكەسىنە ارنالعان قۇتتىقتاۋ حاتىن وقىدى.
ن. ەرمەكبايەۆ ءوز تاراپىنان پراۆوسلاۆيە شىركەۋىنىڭ ەل ازاماتتارىنىڭ رۋحاني ومىرىندەگى ماڭىزدى رولىنە توقتالىپ، ونىڭ ەلىمىزدەگى بەيبىتشىلىك پەن تىنىشتىقتى نىعايتۋعا، قازاقستاندىق قوعامنىڭ دامۋىنا قوسىپ كەلە جاتقان ۇلەسىن اتاپ ءوتتى، دەلىنگەن Facebook-تەگى مينيسترلىكتىڭ حابارلاماسىندا.
سونداي-اق، مينيستر قازاقستانداعى پراۆوسلاۆيەلىك حريستيان ءدىنى ءوزارا تۇسىنىستىك پەن كونفەسسياارالىق ديالوگتىڭ دامۋىنا ىقپال ەتەتىن، بالالاردى تاربيەلەۋگە جانە وتباسى ينستيتۋتىن نىعايتۋعا ايرىقشا كوڭىل بولەتىن ىقپالدى مادەنيەت قۇراۋشى فاكتور بولىپ تابىلاتىندىعىن اتاپ ءوتتى.
ءىس-شارا بارىسىندا مينيستر مەملەكەت باسشىسىنىڭ جارلىعىن ورىنداۋ اياسىندا ميتروپوليت الەكساندرعا مەملەكەتتىك جانە قوعامدىق قىزمەتتەگى ەڭبەگى، ەلىمىزدىڭ الەۋمەتتىك-ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسى ءۇشىن جوعارى مەملەكەتتىك ناگرادا «پاراسات» وردەنىن تابىستادى.
كەزدەسۋ سوڭىندا مينيستر بارشا پراۆوسلاۆيەلىك حريستيان ءدىنىنىڭ وكىلدەرىن جانە وتانداستاردى روجدەستۆو مەرەكەسىمەن قۇتتىقتاپ، زور دەنساۋلىق، باقىت، بەيبىتشىلىك جانە قازاقستان رەسپۋبليكاسىنىڭ يگىلىگى جولىندا اتقاراتىن جۇمىستارىنا ساتتىلىك تىلەدى.
