ەلباسى الماتى قالاسىنىڭ اكىمىن قابىلدادى
قازاقستان پرەزيدەنتىنىڭ الماتىداعى رەزيدەنتسياسىندا وتكەن كەزدەسۋ بارىسىندا باۋىرجان بايبەك مەملەكەت باسشىسىنا قالانىڭ الەۋمەتتىك-ەكونوميكالىق دامۋى جونىندە اتقارىلىپ جاتقان جۇمىستار تۋرالى باياندادى.
نۇرسۇلتان نازاربايەۆ الماتى رەسپۋبليكا ەكونوميكاسىندا ماڭىزدى ءرول اتقاراتىنىن اتاپ ءوتىپ، قالانى دامىتۋ ماسەلەلەرىن ۇدايى نازاردا ۇستايتىنىن ايتتى.
- ەگەر قالا حالقى 2 ميلليون ادامنان اسسا، ول ەكونوميكالىق تۇرعىدان ءوزىن-ءوزى تولىق قامتاماسىز ەتە الادى. قالا جاڭا مۇمكىندىكتەر تۋعىزىپ، شاعىن جانە ورتا بيزنەستىڭ دامۋىنا جول اشادى. مۇنداي قالالار شيكىزاتسىز-اق كوركەيىپ، ەلىمىزدى وركەندەتۋگە ۇلەس قوسادى، - دەدى ەلباسى.
قازاقستان پرەزيدەنتى الماتىنى گازبەن قامتۋ جانە ونىڭ ەكولوگياسىن جاقسارتۋ ماسەلەلەرىنە نازار اۋداردى.
- بىزگە ەلەكتر ستانسيالارى مەن تۇرعىن ۇيلەردى گازبەن قامتۋ، قوعامدىق جانە جەكە اۆتوكولىكتەردى گازعا كوشىرۋ باعىتىنداعى جۇمىستاردى جالعاستىرۋ قاجەت. كەلەشەكتە ءبىز الماتى مەن استانادا تەك ەلەكتروموبيلمەن جۇرەتىن جاعدايعا جەتۋىمىز كەرەك، - دەدى مەملەكەت باسشىسى.
الماتى قالاسىنىڭ اكىمى ەلباسىعا قالاداعى ۇلكەن اينالما اۆتوموبيل جولى قۇرىلىسىنىڭ باستالعانىن ايتىپ، وعان 1,5 ميلليارد ا ق ش دوللارى كولەمىندە ينۆەستيتسيا تارتىلعانىن مالىمدەدى.
- بۇل جوبا ىسكە اسىرىلعان كەزدە قالاداعى كولىك اعىنىن كۇنىنە %10 عا نەمەسە 40-60 مىڭ اۆتوموبيلگە ازايتۋعا مۇمكىندىك بەرەدى. ول قالانىڭ ەكولوگيالىق جاعدايىن جاقسارتىپ، الماتىنىڭ كولىك-لوگيستيكا جەلىسىن «باتىس ەۋروپا - باتىس قىتاي» جۇيەسىنە قوساتىن بولادى، - دەدى باۋىرجان بايبەك.
سونىمەن قاتار كەزدەسۋ بارىسىندا ونەركاسىپ ورىندارىن قالا سىرتىنا كوشىرۋ ماسەلەلەرى تالقىلانىپ، ازاماتتاردىڭ الەۋمەتتىك تۇرعىدان وسال توپتارىن تۇرعىن ۇيمەن قامتاماسىز ەتۋ جونىندە الماتى قالاسى اكىمدىگى قابىلداپ جاتقان شارالار قاراستىرىلدى.
- بيىل 6 مىڭعا جۋىق جالدامالى پاتەر، ونىڭ ىشىندە اتلەتتەر قالاشىعىندا 1748 پاتەر بەرىلدى. وسىلايشا، كەزەكتە تۇرعان ءاربىر ءۇشىنشى وتباسى تۇرعىن ۇيمەن قامتاماسىز ەتىلدى، - دەدى قالا اكىمى.
كەزدەسۋ سوڭىندا نۇرسۇلتان نازاربايەۆ الماتى قالاسىن ودان ءارى دامىتۋ جونىندە ءبىرقاتار ناقتى تاپسىرما بەردى.
