الداعى بەس جىلدا ەكونوميكاسى وسەتىن ەلدەر بولجاندى

استانا. قازاقپارات - Fitch Ratings حالىقارالىق رەيتينگ اگەنتتىگى الەمدەگى دامۋشى 10 مەملەكەتتىڭ ەكونوميكالىق وسىمىنە بولجام جاسادى. ونىڭ ىشىندە تۇركيا دا بار. ەسەپكە سايكەس، جاقىن بەس جىلدا تۇركيا ەكونوميكاسى ءبىر جىلدا شامامەن 4,8 پايىزعا كوتەرىلمەك، دەپ حابارلايدى «انادولى».

Fitch Ratings اگەنتتىگىنىڭ ساراپتامالىق بايانداماسىندا تۇركياعا ينۆەستيتسيا قۇيىلۋ دەڭگەيى جوعارى قالپىندا ساقتالادى دەپ بولجام جاسالعان. رەيتينگ ساتىسىندا 4,8 پايىزدىق ءى ج ءو بولجامىمەن تۇركيا ءۇشىنشى ورىندا تۇر.

بولجامعا سايكەس، دامۋشى ەلدەر ىشىندە دەموگرافيالىق فاكتورلاردىڭ ىقپالىمەن جانە ەلگە سالىناتىن مول ينۆەستيتسيانىڭ ەسەبىنەن ءبىرىنشى ورىنعا ءۇندىستان شىعادى. الداعى بەس جىلدا ءۇندىستان ەكونوميكاسىنىڭ جىلدىق ورتاشا ءوسىمى 6,7 پايىزدى قۇراماق.

 ودان كەيىنگى ورىنداردا 5,5 پايىزدىق وسىممەن قىتاي جانە يندونەزيا تۇر.

 Fitch Ratings بولجامىنا سايكەس، مەكسيكا، پولشا جانە وڭتۇستىك كورەيا ەكونوميكاسىنىڭ ورتاشا جىلدىق ءوسىمى الداعى بەس جىلدا 2,5-3 پايىزدى كورسەتەدى. وڭتۇستىك افريكا، رەسەي جانە برازيليا كورسەتكىشى 2 پايىزدان تومەن دەپ بولجانعان.