ساپاربايەۆ بيۋدجەت قارجىسىنىڭ يگەرىلمەۋ سەبەبىن انىقتاۋدى تاپسىردى
اقتوبە اكىمدىگىندە ءوڭىر باسشىسى بەردىبەك ساپاربايەۆتىڭ قاتىسۋىمەن جيىن ءوتتى. جيىن كەزىندە بيۋدجەتتىڭ يگەرىلۋى ءسوز بولدى. اقتوبە وبلىستىق قارجى باسقارماسىنىڭ باسشىسى گۇلقاسيما سۇيىنتايەۆانىڭ ايتۋىنشا، وتكەن جىلى جەرگىلىكتى بيۋدجەتتىڭ ناقتى ءتۇسىمى 100,6 ميلليارد تەڭگەنى قۇرادى.
«بارلىق اۋدان مەن قالا بيۋدجەتىنىڭ كىرىسى ارتتى. 2015-جىلمەن سالىستىرعاندا وتكەن جىلى كىرىس 13 ميلليارد تەڭگە ءوسىپ وتىر. ال شىعىس بولىگى %99,4 نەمەسە 228,5 ميلليارد تەڭگەگە ورىندالدى. 1,4 ميلليارد تەڭگە يگەرىلمەي قالدى»، - دەدى گ. سۇيىنتايەۆا.
اۋداندار مەن وبلىستىق بيۋدجەتتىك مەكەمەلەر قارجىنى تولىق يگەرگەن. تەك اقتوبە قالاسى مەن حرومتاۋ اۋدانى جوسپارلى جۇمىستى اتقارا المادى.
«ءبىز ءار اپتا سايىن جينالىس وتكىزىپ، بيۋدجەتتىڭ يگەرىلۋىن تارماقتار بويىنشا قاراستىردىق. بيۋدجەتتىك باعدارلامالاردىڭ اكىمشىلەرىنە بولىنگەن قارجىنى ءجۇز پايىز يگەرۋ جونىندە ناقتى تاپسىرمالار بەرىلدى. الايدا، بۇل تاپسىرما تولىق ورىندالعان جوق»، - دەدى ءوڭىر باسشىسى بەردىبەك ساپاربايەۆ.
وبلىس اكىمى قارجىنىڭ نە سەبەپتى يگەرىلمەي قالعانىن انىقتاپ، جاۋاپتى قىزمەتكەرلەردى جازالاۋدى تاپسىردى.
اۆتور: التىناي ساعىندىقوۆا
