بالانىڭ تازا وسۋىنە كۇننىڭ ساۋلەسى، تازا اۋا قاجەت
ادام بالاسى ونە بويىنا تىنىسىن ىشىنە تاراتقاندا، تازا اۋا جۇتىپ، تىنىسى سىرتقا شىققاندا، كەرەكسىز اۋانى سىرتقا شىعارىپ وتىرادى. ادام كوپ جيىلعان ءۇيدىڭ سوندىقتان اۋاسى ناشارلانىپ، ادامنىڭ تىنىسى تارىلىپ تۇرادى. بۇعان جانە كوپ كىسىنىڭ تەرلەگەن ءيىسى دە قوسىلادى.
ءبىزدىڭ قازاقتىڭ جىلى ۇيىندە الگى ايتىلعانداردىڭ ۇستىنە بۇزاۋ- تورپاعى دا جاتادى، قازانى دا اسىلادى، كىرى دە جۋىلادى. سونىمەن الاقانداي تەرەزەسى بار، توبەسى باسىڭا تيگەندەي الاسا، تار ءۇيدىڭ اۋاسى تىم ناشار بولادى. مۇنداي اۋادا ۇلكەن كىسى تۇنشىعا جازداسا، ەمشەك بالاسىنىڭ دەرتتى بولىپ، ولۋىنە سەبەپ بولادى.
سوندىقتان بالالاردىڭ وكپەسى ساۋ بولىپ، تىنىسى كەڭ بولۋى ءۇشىن كۇنىنە ءبىر-ەكى مەزگىل ەسىك اشىپ، ءۇيدى جەل قاقتىرىپ الۋ دۇرىس. بالاعا سۋىق تيەدى دەپ، قاۋىپتەنۋ قاتە. بەتىن اشىق قالدىرىپ، دەنەسىن كورپەمەن جاۋىپ قويسا بولادى. ەمشەك بالاسىن ءالسىن- ءالسىن دالاعا الىپ شىعىپ جۇرگەن دۇرىس، سۋىق تيەدى دەپ قورقۋدىڭ قاجەتى جوق.
قىرقىنان شىققان بالانى قىستى كۇنى جەلسىز ايازعا شىعارۋعا بولادى. اۋەلى ازداپ شىعارىپ، بارا- بارا ۋاقىتىن ءبىر ساعات شاماسى جۇرگىزۋگە دە بولادى. بالانى دالاعا شىعارعاندا بەتىن جابۋدىڭ قاجەتى جوق، تەك سۋىقتا مۇرنى، قۇلاعى ءۇسىپ قالماۋىن قاراۋ كەرەك، كيىمى جىلى بولعانى دۇرىس.
وسىنى، اسىرەسە قىستاۋداعى ەل ايەلى قاتتى ەسكەرۋى كەرەك. ءبىزدىڭ قىسقى جىلى ۇيلەرىمىز تۇككە تاتىمايدى دەسەك، ەل نامىستانباسىن، نامىستانسا، ۇيلەرىن تۇزەتەر. قىستى كۇنى بالانى ىلعي ءتۇس كەزىندە كۇن بارىندا شىعارعان دۇرىس.
جاز تۋعان بالا كۇنى بويى دالادا بولۋى مۇمكىن. ءبىراق كۇننىڭ ىستىعىندا كولەڭكەدە ۇستاعان دۇرىس. ىستىق كۇندەردە ەمشەك بالاسىنا ارا- تۇرا قايناعان سالقىن سۋ ىشكىزۋ قاجەت. وقىمىستى دارىگەرلەردىڭ ايتۋىنا قاراعاندا، كۇن ساۋلەسى - دەرت بىتكەننىڭ جاۋى. جۇقپالى اۋرۋلاردىڭ قۇرتىن كۇن ساۋلەسى ولتىرەدى. اعاشتىڭ جازعىتۇرعى بۇرشىگىندە كۇننىڭ كوزى جارقىراپ جارىق ساۋلەسىن تۇسىرگەنىندە عانا جاپىراقتانىپ، جاسارا باستايدى. ادام بالاسىنا ۇلكەن بولسىن، كىشى بولسىن، سول سياقتى كۇننىڭ ساۋلەسى كەرەك.
اسىرەسە ەمشەك بالاسىن كۇن كوزىنەن قاشىرتۋ قاتە. بالا جاتقان ءۇيدىڭ تەرەزەسىنەن ونە بويى كۇن ءتۇسىپ تۇرعانى دۇرىس. بالانىڭ توسەگى كۇن تۇسكەن جەردە تۇرسىن. تۇراقتى كۇن تۇسپەيتىن، قاراڭعى ۇيلەردە كوبىندە دىمقىل بولادى. ونداي ۇيدە وسكەن بالا ناشار، كەۋدەسى تار، قانسىز، ءسولسىز بولىپ وسەدى. بالانىڭ مەشەل بولۋىنىڭ دا ءبىر ۇلكەن سەبەبى - وسى كۇننەن قاشىق وسكەندىك.
