بيىلعى جىلى «قازاق فيلم» كينوسۇيەر قاۋىمعا نە ۇسىنادى
جيىنى 48 تۋىندى قانداي تاقىرىپتاردى قامتيتىنى جانە «قازاق فيلم» كينوستۋدياسىنىڭ جوسپارى تۋرالى «قازاقپارات» ح ا ا تىلشىسىنە كينوستۋديانىڭ باسپا ءسوز قىزمەتىنىڭ جەتەكشىسى اينۇر يسايەۆا ايتىپ بەردى.
«جالپى، 2017 - جىل شاكەن ايمانوۆ اتىنداعى «قازاق فيلم» كينوستۋدياسى ءۇشىن وتە ولجالى جىل بولدى. كوپتەگەن كوركەم، دەرەكتى، انيماتسيالىق جانە قىسقامەتراجدى دەبيۋتتىك فيلمدەر ءتۇسىرىلدى. 2015 -جىلدا وندىرىسكە جىبەرىلگەن كوپتەگەن تولىق مەتراجدى فيلمدەردىڭ ءوندىرىسى 2017 -جىلدىڭ سوڭىندا اياقتالىپ، قازىرگى ۋاقىتتا قولىمىزدا دايىن تۇر. اتاپ ايتار بولساق، 18 تولىق مەتراجدى كوركەم فيلم، 21 دەرەكتى تولىق مەتراجدى فيلم، 6 قىسقا مەتراجدى دەبيۋتتىك فيلم جانە 2 تولىق مەتراجدى انيماتسيالىق فيلمدى بيىل ءبىزدىڭ كينوستۋديا حالىققا ۇسىنادى. الدىمىزداعى جىلى وسى تۋىندىلاردىڭ بارلىعى كورەرمەنگە جول تارتادى»، - دەيدى اينۇر يسايەۆا.
كينوستۋديا وكىلىنىڭ ايتۋىنشا، 2017 -جىلى «قازاق فيلم» تۇسىرگەن ءۇش فيلم: رەجيسسەر رۇستەم ءابدىراشوۆتىڭ «قازاق حاندىعى: الماس قىلىش»، ءسابيت قۇرمانبەكوۆتىڭ «ورالمانى»، تالعات تەمەنوۆتىڭ «ءبىزدىڭ قالانىڭ حانزاداسى» اتتى ءۇش فيلمى پروكاتقا شىققان.
اينۇر يسايەۆا «قازاق حاندىعى: الماس قىلىش» پەن «ورالمان» فيلمى تابىستى كورسەتكىشكە قول جەتكىزگەنىن اتاپ ءوتتى.
«2018 -جىلى كورەرمەنگە جول تارتاتىن فيلمدەردىڭ كەيبىرەۋىن اتاپ وتەيىن. 18 تولىقمەتراجدى فيلم تۋرالى ايتار بولسام، ولاردىڭ قاتارىندا بارىمىزدە كۇتىپ وتىرعان قاناعات ءمۇستافيننىڭ «16 قىز - 2» كومەدياسى، ءابىش كەكىلبايەۆتىڭ «شىڭىراۋ» پوۆەسىنىڭ نەگىزىندە تۇسىرىلگەن «شىڭىراۋ» اتتى كوركەم فيلم، اسانالى ءاشىموۆ باستى ءرولدى ويناعان «ۆ تەني ۆەتۆەي ناد كوسوگوروم» اتتى تۋىندىلار بار. اسانالى ءاشىموۆ تۇسكەن كينو تۋىندىنىڭ ناقتى اتاۋى ەمەس، وزگەرتىلۋى مۇمكىن. ول كوركەم فيلم مىندەتتى تۇردە قازاق تىلىنە اۋدارىلادى»، - دەيدى اينۇر يسايەۆا.
سونداي- اق، كوپشىلىك كۇتىپ وتىرعان «بالۋان شولاق» (باستى ءرولدى اكتەر ەركەبۇلان دايىروۆ سومدايدى) تۋىندىسى بيىلعى جىلى كوپتىڭ نازارىنا ۇسىنىلماق. الەۋمەتتىك تاقىرىپتا مۇمكىندىگى شەكتەۋلى بالالار تۋرالى «ديەۆۋشكا ي مورە» جانە رەجيسسەر ەمير بايگازيننىڭ «رەكا» اتتى فيلمى دە بيىل كورسەتىلەدى.
«بالالارعا جول تارتقالى وتىرعان 2 انيماتسيالىق فيلم بار. تولىق مەتراجدى ولاردىڭ بىرەۋى ەكسپو كەزەڭىندە تۇسىرىلگەن. اتاۋى - كۇلتەگىن. كىشكەنتاي بالالارعا پاتريوتتىق تاربيە بەرەتىن تۋىندىنىڭ اۆتورى - اداي ءابىلدينوۆ. سونىمەن قاتار، تۇردىبەك مايدان مەن تىلەك تىلەۋعازىنىڭ «مۇزبالاق» اتتى انيماتسيالىق فيلمى بيىلعى جىلى بالالاردى قۋانتپاق»، - دەيدى اينۇر يسايەۆا.
كينوستۋديانىڭ باسپا ءسوز قىزمەتىنىڭ جەتەكشىسى 2018 -جىلى شىعاتىن دەرەكتى فيلمدەردىڭ كوبى مەملەكەت تاراپىنان تاپسىرىلعان شىعارمالار ەكەنىن ايتادى.
«ۇلكەن مەملەكەت - ۇلكەن وتباسى» باعدارلاماسى اياسىندا بىرنەشە فيلم ءتۇسىرىلدى. سونداي- اق، «قازاقستان - ءبىزدىڭ ورتاق ءۇيىمىز» باعدارلاماسى اياسىندا تۇسىرىلگەن بىرنەشە فيلمدەرىمىز بار. قازاق تاريحىنىڭ بەلگىلى تۇلعالارى قاز داۋىستى قازىبەك بي تۋرالى دەرەكتى فيلمدى بيىل تاماشالاي الاسىزدار. سونىمەن قاتار، الاش اۆتونومياسىنىڭ 100 جىلدىعىنا ارنالعان «الاش تۋى استىندا» اتتى دەرەكتى تۋىندى دايىن تۇر. وسىلاردى بيىل كورەرمەندەرگە ۇسىنامىز. سىبايلاس جەمقورلىققا، تەرروريزمگە قاتىستى تۇسىرىلگەن دەرەكتى فيلمدەر بار»، - دەيدى اينۇر يسايەۆا.
2017 - جىلى «قازاق فيلم» تۋىندىسىنىڭ فيلمدەرى 27 كينوفەستيۆالدان 27 جۇلدە يەلەنگەن ەكەن. اينۇر يسايەۆا سونىمەن قاتار، كينوستۋديانىڭ جوسپارىمەن ءبولىستى.
«2017 - جىلى وندىرىسكە جىبەرىلگەن 4 اۋقىمدى فيلم بار. ولار 2018 -جىلدىڭ اياعىندا عانا دايىن بولادى. اتاپ ايتقاندا، اقان ساتايەۆتىڭ «توميريس» فيلمى مەن «ۆ ەپيتسەنترە ميرا: پۋت ليدەرا» اتتى فيلمى، جازعى وليمپيادا ويىندارىنىڭ تۇڭعىش التىن مەدالىن العان قازاق جاقسىلىق ۇشكەمپىروۆكە ارنالعان «جەڭىمپاز» اتتى كوركەم فيلمى. سونىمەن بىرگە، قازاقستاندا پايدا بولعان العاشقى بىرلەسكەن «فوكس» ستۋدياسىنىڭ تاريحى تۋرالى تۇسىرىلگەن «ەۆاكۋتسيا» اتتى كوركەم فيلم تۇسىرىلمەك. بۇل - جوسپارداعى جۇمىس»، - دەپ ءتۇيدى اينۇر يسايەۆا.
فوتوسۋرەت Brod.kz سايتىنان الىندى
اۆتور: ايان بەكەن ۇلى
