دەسانتشى قارۋ كەزەنگەن قىلمىسكەردىڭ تاپانشاسى مەن گراناتاسىن تارتىپ الدى

استانا. قازاقپارات - دەسانتتىق- شابۋىل اسكەرىنىڭ پودپولكوۆنيگى زاكير كاراچيەۆ بۇرىن قىلمىستىق جاۋاپكەرشىلىككە تارتىلعان ازاماتتىڭ قولىنان قارۋىن تارتىپ الىپ، پوليتسيا قىزمەتكەرلەرىنە تاپسىردى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

اسكەري قىزمەتكەردىڭ ايتۋىنشا، ءدال سول كۇنى جاقىن دوسىنىڭ ۇيىنە قوناققا بارىپتى. وتىرىس ەندى قىزا باستاعاندا، ەسىكتىڭ قوڭىراۋى شىرىلدايدى. ءۇيدىڭ يەسى ەسىكتى اشىپ، باسپالداق الاڭقايىنا شىعىپ كەتكەن. سىرتتان جەتكەن داۋىستاردىڭ قاتتى ەستىلە باستاعانىن بايقاعان پودپولكوۆنيك كاراچيەۆ دوسىنىڭ ارتىنا دالاعا شىعىپ وعان بەلگىسىز بىرەۋدىڭ تاپانشا كەزەنىپ تۇرعانىن بايقايدى. جىلدام قيمىلداعان دەسانتشى قاراقشىنىڭ قولىنداعى تاپانشانى قاعىپ تۇسىرەدى. ءبىراق ول ەكىنشى قولىمەن قالتاسىنان گراناتا شىعارىپ ۇلگەرگەن ەدى. اسكەري قىزمەتشى ونى قولىمەن قىسىپ، قويان-قولتىق ۇرىس ايلا-ءتاسىلىن قولدانىپ، شابۋىل جاساعان ادامنىڭ قولىنان سۋىق قارۋدى جۇلىپ الدى. ەر ادام قاتتى قارسىلىق كورسەتكەندىكتەن ونى پوليتسيا قىزمەتكەرلەرى كەلگەنگە دەيىن بايلاپ تاستاۋعا تۋرا كەلدى.

كەيىننەن المالى اۋداندىق ءى ءى ب- دە ۇستالعان ادامدا تاپانشا مەن گراناتادان باسقا گاز باللونى، باكى جانە 200 دوللارلىق قولدان جاسالعان اقشا بولعانى انىقتالدى. بۇدان بۇرىن ول ۇرلىق پەن بۇزاقىلىق ءۇشىن ۇستالعان. تەرگەۋ كەزىندە قىلمىسكەردىڭ ەسىكتەن جاڭىلىسقانى انىقتالدى.

«ارينە، مەنىڭ بويىمدى ۇرەي بيلەدى، ءبىراق، ءوزىم ءۇشىن قورىققان جوقپىن. مەن وتباسىلارىمىز ءۇشىن الاڭدادىم. پاتەردە ايەلدەرىمىز بەن بالا-شاعامىز قالدى. ەگەر دە ءبىز شاقىرىلماعان قوناقتى قارۋسىزداندىرماعاندا، ولارعا ۇلكەن قاۋىپ تونەر ەدى»، - دەيدى پودپولكوۆنيك زاكىر قاراشيەۆ.

بۇل دەسانتشى اسكەري قىزمەتشىلەر اراسىنداعى العاشقى باتىل ارەكەت ەمەس. ەستەرىڭىزگە سالا كەتسەك، بىلتىر ەفرەيتور دانيار ەشايداروۆ ءوزىنىڭ ومىرىنە قاۋىپ توندىرە وتىرىپ، تاس جولدا كولىك باسىپ كەتە جازداعان ەكى جاسار بالانى قۇتقارىپ قالعان بولاتىن. ال كىشى سەرجانت عالىمجان اليۋحانوۆ ورتەنگەن پاتەردىڭ ىشىنەن ەكى بالانى امان-ەسەن الىپ شىقتى.