اقتوبەدە ايىپتالۋشى ۇيقىسى قانباعانى ءۇشىن سوتتى كەيىنگە شەگەرۋدى سۇرادى
ايىپتالۋشى جاندوس اقماعامبەتوۆ جاۋاپ الۋدى كەيىنگە شەگەرۋدى سۇرادى، دەپ حابارلايدى قازاقپارات ءتىلشىسى.
اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا ەركىن ءىزباسار، اۋحات قاليەۆ، قالدىمۇرات قارتجان، مۇرات تۇرجانوۆ، نۇرلان نوعايەۆ، جاندوس اقماعامبەتوۆكە قاتىستى رەيدەرلىك جولمەن تارتىپ الۋ ەپيزودى قارالدى.
قىلمىستىق كودەكستىڭ «جالعان قۇجاتتاردى، ءمورتابانداردى، مورلەردى، بلانكىلەردى، مەملەكەتتىك پوشتا تولەمى بەلگىلەرىن، مەملەكەتتىك ناگرادالاردى قولدان جاساۋ، دايىنداۋ نەمەسە وتكىزۋ»، «سەنىپ تاپسىرعان بوتەن مۇلىكتى يەمدەنىپ الۋ نەمەسە تالان-تاراجعا سالۋ» باپتارى بويىنشا ايىپتالۋشىلار مەن جابىرلەنۋشىلەردەن جاۋاپ الۋ باستالدى.
«مەن تاڭعى ساعات 5 تە جاتىپ، 7 دە ۇيقىدان تۇردىم. ەكى ساعاتتا ۇيقىم قانبادى. ۇيدە اۋىراتىن انام بار، باسقا دا شارۋالارىم شىعىپ قالدى. بۇگىن «تازادالاكوم» ج ش س- نە قاتىستى ەپيزود قارالادى دەپ ويلاعانىم جوق. ءبىراق مەن دايىنمىن. تىلشىلەردى شاقىرىپ، كورسەتۋلەرىن سۇرايمىن. سەبەبى، تىرنەكتەپ جيناعان ابىرويىم توگىلدى. ۇيىمداسقان قىلمىستىق توپ قۇردى، مۇناي ۇرلادى دەپ ايىپتالعان توپتىڭ تىزىمىنە ەنىپ كەتكەنمىن. ءوزىم ەمشىمىن. مەنى سۋرەتتەن كورىپ، تانىپ قالعان ادامدار ەمگە كەلۋدى توقتاتتى، تۋعان-تۋىستارىم اڭگىمەگە قوستى. ءبىر جىل بويى مازالادى. مەن ابىرويىمدى قورعاپ قالامىن»، - دەدى ايىپتالۋشى جاندوس اقماعامبەتوۆ.
ايتا كەتەيىك، سوت وتىرىسى كەزىندە جابىرلەنۋشى ب. «تازادالاكوم» ج ش س 2008-جىلى قۇرعانىن جەتكىزدى. بۇل كومپانيا مۇناي قالدىقتارىن ساقتايتىن پوليگون اشىپ، قالدىقتى وڭدەپ، زالالسىزداندىرعان. العاشىندا كومپانيانى ءۇش ادام اشتى. ءبىرى يدەيا ايتىپ، ەكىنشىسى قۇجاتتاردى جيناپ، ءۇشىنشىسى قارجى سالدى. كەيىن تاعى ەكى ادام قاتارعا قوسىلدى. ال 2012-جىلى سالىق باسقارماسىمەن قيىندىقتار بولىپ، كومپانيا تابىسى بەسكە ءبولىندى. سول كەزدە كومپانيا يەسى ءوزىنىڭ 80 نەن اسقان اكەسىنە ۇلەسىن اۋدارعان. بۇگىن سوت وتىرىسى كەزىندە اكەسى مەن بالاسى جابىرلەنۋشى تاراپ رەتىندە جاۋاپ بەردى.
«مەن سوتتالۋشىلار اراسىنان نۇرلان نوعايەۆتى عانا تانيمىن. 2008-جىلى «تازادالاكوم» كومپانياسىن اشتىم. 2012-جىلى سالىقتىق قيىندىقتار بولىپ، ءتورت سەرىكتەس وزدەرىنە تيەسىلى ۇلەستى الىپ، ءبولىندى. مەندە 60 ميلليون تەڭگەنىڭ قۇرال-جابدىعى مەن كومپانيا قالدى. ول كەزدە مەن نۇرلان نوعايەۆتىڭ قايىن اتاسىمەن تانىس بولدىم. قايىن اتاسىمەن سويلەسىپ، سالىقتىق ماسەلەلەر بويىنشا كەڭەس بەرە الاتىن ادام بار ما دەپ سۇرادىم. سول كەزدە قايىن اتاسى كومەكتەسەتىنىن، كۇيەۋ بالاسىنا 30 پايىزدىق ۇلەسپەن كومپانياعا كىرۋدى ۇسىندى. جۇمىس ءجۇردى، سول كەزدە نوعايەۆتىڭ پاتەرىنىڭ نەسيەسى شەشىلدى. كومپانيادا ديرەكتوردىڭ ورىنباسارى بولدى. كەيىن قىتايدان قۇرال-جابدىق الۋعا دەپ بولىنگەن 10 ميلليون تەڭگەنى نوعايەۆ ءوز قاجەتتىلىگىنە جۇمسادى»، - دەدى جابىرلەنۋشى ب.
سوت وتىرىسى كەزىندە جابىرلەنۋشى ب. ءوندىرىس ماسەلەلەرى جونىندەگى ورىنباسارىنا جۇمىستى سەنىپ تاپسىرىپ، ءىس ساپارعا كەتكەنىن جەتكىزدى. سول كەزدە ول ءوز كومپانياسىنان ايىرىلىپ قالعان.
«اكەم ۇلەسكەر بولعانىمەن، مەنىڭ جۇمىسىما ارالاسقان جوق. قۇجاتقا قول قويۋ قاجەت بولعاندا كەدەرگى بولماۋىن قالادىم. 10 كۇننەن سوڭ ورىنباسارىم حابارلاسىپ، ديرەكتوردى وزگەرتۋ تۋرالى حاتتاماعا قول قويعانىن ايتتى. ونى قورقىتقان. ءبىراق ءىس اياقتالمادى. زاڭگەرلەرگە بارعاندا قايتا جينالىس وتكىزۋدى ۇسىندى. ازاماتتىق ارىز ءتۇسىرىپ، بىرنەشە رەت سوتتا جەڭىلدىك. مەنىڭ 70 پايىزدىق ۇلەسىم قايدا كەتكەنىن بىلمەيمىن. قازىر 50-60 ميلليون تەڭگە سالىقتىق تولەم مەنىڭ اتىمدا تۇر. ءوزىم ناماز وقيمىن. جۇمىسشىلاردىڭ كوبى ءدىن جولىن ۇستانۋشىلار بولدى. ولار جۇمىسقا ورنالاسا الماعان سوڭ ماعان كەلدى. جۇمىسشىلارىمىز 70-80 گە جەتتى»، - دەدى جابىرلەنۋشى ب.
اقتوبەدە ايىپتالۋشى ۇيقىسى قانباعانى ءۇشىن سوتتى كەيىنگە شەگەرۋدى سۇرادى. ايتا كەتەيىك، جابىرلەنۋشى ب. سوتتالۋشى ن. نوعايەۆتىڭ سۇراقتارىنا جاۋاپ بەرە المادى. ارادا 4 جىل وتكەندە كوپ جايت ەسىندە ساقتالماعان. سونىمەن قاتار، ول باستى ايىپتالۋشى ەركىن ءىزباساردى تانىمايتىنىن، جۇمىس كەزىندە ونىڭ اتى-ءجونى مۇلدە اتالماعانىن جەتكىزدى.
سوت وتىرىسى بۇگىن جالعاسادى.
