قازاقستاننىڭ ۇسىنۋىمەن العاش رەت ب ۇ ۇ ق ك- ءنىڭ جاڭادان سايلانعان تۇراقتى ەمەس مۇشە ەلدەرىنىڭ تۋلارى كوتەرىلدى

استانا. قازاقپارات -  بۇگىن قازاقستاننىڭ ۇسىنۋىمەن ب ۇ ۇ تاريحىندا العاش رەت قاۋىپسىزدىك كەڭەسىنىڭ جاڭادان سايلانعان تۇراقتى ەمەس مۇشە ەلدەرىنىڭ تۋىن كوتەرۋ شاراسى ءوتتى.

وعان كوپتەگەن حالىقارالىق اقپارات قۇرالنىڭ وكىلدەرى جينالدى. تىڭ جاڭالىق تۋرالى امەريكالىق Fox News تەلەارناسى مەن Washington Post باسىلىمى اتاپ ءوتتى.

 ال سالتاناتتى راسىمگە قاتىسقان دەلەگاتسيا وكىلدەرىنىڭ ايتۋىنشا، مۇنداي شارا كەڭەستىڭ جاڭا مۇشەلەرىنىڭ الەمدىك قاۋىمداستىق الدىنداعى جاۋاپكەرشىلىگىن ارتتىرا تۇسەدى.

 «بۇگىن قازاقستاننىڭ ۇسىنۋىمەن العاش رەت ب ۇ ۇ قاۋىپسىزدىك كەڭەسىنىڭ جاڭا التى مۇشەسى: ەكۆاتوريالىق گۆينەيا، كوت- د'يۆۋار، كۋۆەيت، نيدەرلاند، پەرۋ جانە پولشا ەلىنىڭ تۋلارى كوتەرىلدى. سالتاناتتى شارا قازاقستاننىڭ ب ۇ ۇ- داعى تۇراقتى وكىلى قايرات وماروۆتىڭ باسشىلىعىمەن جۇزەگە اسىرىلدى».

www.24.kz