يراندىقتار زورلىق- زومبىلىققا قارسى شىعۋدا - ب ا ق

استانا. قازاقپارات - لۋرەستان، حۋزەستان، يلام، كۋم، كەرمانشاح، گۇلستان، ماركازي پروۆينتسيالارىندا تۇرىپ جاتقان يراندىقتار سوڭعى كۇندەرى يراننىڭ ءار ءتۇرلى قالالارىندا بولىپ جاتقان تارتىپسىزدىكتەر مەن زورلىق- زومبىلىققا قارسىلىق ءبىلدىرىپ كوشەگە شىقتى، دەپ حابارلايدى ي ر ن ا.

اگەنتتىكتىڭ مالىمەتىنشە، ەرەۋىلشى توپ قولدارىنا اياتوللا ءالي حامەنەيگە قولداۋ ءبىلدىرۋ جانە زورلىققا قارسىلىق جايلى ۇران ۇستاپ شىقتى. سونىمەن قاتار ولار يران حالقىنىڭ زاڭدى تالاپتارىن ورىنداۋ قاجەت ەكەنىن دە جەتكىزگەن.

 نارازىلىق شەرۋلەرىنە ەلدەگى ەكونوميكالىق جاعداي، جەمقورلىق، باعانىڭ كوتەرىلۋى جانە جۇمىسسىزدىق سەبەپ بولعان. الايدا، كەيبىر وپپورتۋنيستەر وسى وقيعالاردى تەرىس نيەتتە پايدالانىپ، يران حالقىنىڭ قۇقىقتارىن بۇزىپ، قوعامدىق مەنشىگىنە زالال كەلتىرۋدە، دەپ جازادى اگەنتتىك.

28 - جەلتوقساننان بەرى ءورشىپ تۇرعان يرانداعى كوشەلەرىندەگى ەرەۋىل سالدارىنان 20 شاقتى ادام قازا بولعان.

 بۇعان دەيىن يران پرەزيدەنتى حاسان رۋحاني قارسىلىق اكسيالارىنىڭ ءورشىپ كەتۋىنە ەل ىشىندەگى ماسەلەلەرمەن قاتار سىرتقى كۇشتەردىڭ دە ىقپالى بار ەكەنىن ايتقان.

 سونىمەن قاتار رۋحاني ەكونوميكالىق پروبلەمالاردى شەشۋدەگى جۇمىستى بەلسەندى جولعا قوياتىنىن ايتىپ ۋادە بەرگەن. «ۇكىمەت جۇمىسسىزدىق، ەكولوگيا جانە ينفلياتسيا ماسەلەسىن شەشۋ جۇمىستارىنا بارىنشا كۇش سالادى»، - دەدى ول.