ترەيلەردى جالعا بەرۋ: شىعىس قازاقستان وبلىسىندا تۋريزمنىڭ جاڭا ءتۇرى پايدا بولماق
ترەيلەردى جالعا بەرۋدى دامىتۋعا بايلانىستى قازىر ش ق و باسشىلىعى ا ق ش پەن قىتايدىڭ تاجىريبەسىن زەرتتەپ جاتىر. بۇل تۋرالى ش ق و تۋريزم جانە سىرتقى بايلانىستار باسقارماسىنىڭ باسشىسى جاسۇلان سارسەبايەۆ ايتتى.
«ءبىزدىڭ ۇلتتىق تابيعي پاركتەر مەن قورىقتار ءۇشىن بۇل تۋريستەر تارتۋدىڭ ناعىز پايدالى جولى بولماق. قازىر 5 جۇلدىزدى قوناقۇيدەن كورى ادام اياعى سيرەك تيەتىن تۇمسا تابيعات اياسىندا بولۋدى قالايتىن تۋريستەر كوپ. تەك سول تابيعات اياسىنا جەتكىزەتىن ينفراسترۋكتۋرا دۇرىس بولۋى كەرەك»، - دەدى جاسۇلان سارسەبايەۆ.
ش ق و باسشىلىعى ا ق ش- تاعى تابيعاتى التايعا ۇقساس مونتانا شتاتىنىڭ تاجىريبەسىن مىسالعا كەلتىرەدى. ول جەردە تاۋلىگىنە 2 مىڭ ترەيلەرگە دەيىن جالعا بەرىلەتىن ارنايى تۇراقتار بار. كولىك- ءۇيدىڭ ىشىندە جاتىپ، تابيعات اياسىندا دەمالىپ كەلۋىڭنىڭ ءبىر كۇنى - 25 دوللاردىڭ اينالاسىندا ەكەن. ترەيلەر ادامعا قاجەت بارلىق ىڭعايلى دۇنيەلەرمەن جابدىقتالعان.
قىتايدىڭ دا تاجىريبەسى وسىعان ۇقساس. ءۇي- كولىكتى جالعا الىپ قىدىرۋ ول جاقتا دا سانگە اينالعان. كولىكتى جۇرگىزۋشىسىمەن ءبىر تاۋلىككە جالعا الۋ ءبىزدىڭ باعامەن 50 مىڭ تەڭگە ەكەن. بۇل ءبىر كۇندە 300 شاقىرىمعا دەيىنگى قاشىقتىقتى قوسا ەسەپتەگەندە.
ش ق و تۋريزم باسقارماسىنىڭ ماماندارى ساياحاتتىڭ مۇنداي ءتۇرى ەلىمىزدىڭ شىعىسىندا دا ۇلكەن سۇرانىسقا يە بولۋى مۇمكىن ەكەنىن ايتادى. جول ماسەلەسىنەن دە ەشقانداي قيىندىق تۋىنداماۋى قاجەت. سەبەبى، سوڭعى ەكى جىلدا ش ق و- داعى ەڭ تانىمال دەمالىس ورىندارىنا اپاراتىن تاس جولداردىڭ بارلىعى كۇردەلى جوندەۋدەن وتكەن.
اۆتور: دارىن نۇرساپار
