ىشىمدىك ءىشۋ «ارالى»، پاتەرىن شاتاستىرعان ستۋدەنت، «جالاڭاش» شىرشا - مەرەكەدەگى قىزىقتى وقيعالار

استانا. قازاقپارات - جىل سايىن جاڭا جىل مەرەكەسىندە كوپتەگەن قىزىقتى وقيعالار ورىن الىپ جاتادى.

مۇنداي وقيعالار كەزدەيسوق تا بولادى. كەيدە ونى ادامداردىڭ ءوزى قولدان جاسايدى. تابالدىرىقتان ەنگەن 2018 -جىلى دا ءبىرقاتار قىزىقتى ساتتەرمەن تولىقتى، دەپ حابارلايدى قازاقپارات.

جاڭازەلانديالىقتار ىشىمدىك ءىشۋ ءۇشىن سۋ ورتاسىنان «ارال» تۇرعىزدى

 

ءبىر توپ جاڭازەلانديالىقتار جاڭا جىلدى تازا اۋادا تويلاۋ ءۇشىن جانە قوعامدىق ورىنداردا ىشىمدىك ىشۋگە سالىنعان تىيىمدى اينالىپ ءوتۋ ءۇشىن جاعا ماڭىندا كىشىگىرىم ارال تۇرعىزعان، دەپ حابارلادى bbc.com.

جەرگىلىكتى ب ا ق- تىڭ حابارلاۋىنشا، ارال تايرۋا وزەنىنىڭ ساعاسىندا تۇرعىزىلعان. وندا ۇستەل مەن سۋسىنداردى سالقىنداتۋ ءۇشىن مۇز سالىنعان جاشىك قويعان. وزەن سۋى قايتا تولعاندا، ارالدىڭ اينالاسىن سۋ باسقان جانە وسىلايشا، ارال تۇرعىزۋشىلار ءسپيرتتى ىشىمدىك ىشۋگە سالىنعان رەسمي تىيىمنان بوساتىلعان. ولار ارالدا تۇتاس جاڭا جىل ءتۇنىن وتكىزىپ، وتشاشۋدى تاماشالاعان.

كوروماندەل قالاسىنىڭ بيلىگى جاڭاجىلدىق مەرەكە كەزىندە قوعامدىق ورىنداردا ءسپيرتتى ىشىمدىك ىشۋگە تىيىم سالىپ، 250 جاڭازەلانديالىق دوللار (180 ا ق ش دوللارى) كولەمىندە ايىپپۇل ەنگىزگەن. الايدا، كۇتپەگەن باستاماعا بيلىك وكىلدەرى قالجىڭمەن جاۋاپ بەرگەن. «جاقسى يدەيا ەكەن - مۇنى بىلگەندە، مەن دە ولارعا قوسىلار ەدىم»، - دەدى جەرگىلىكتى پوليتسيا باسشىسى، ينسپەكتور دجون كەللي.

الماتىدا بەلگىسىز ادامدار ۇرلەمەلى اياز اتانى «ۇرىپ- سوققان»

 

الماتىدا بەلگىسىز ادامدار ۇرلەمەلى اياز اتانى ۇرىپ-سوققان. ۇرلەمەلى اياز اتامەن توبەلەستى كۋاگەرلەر ءتۇسىرىپ العان، دەپ جازدى InAlmaty.kz. https://www.inalmaty.kz/ وقيعا 1 قاڭتار كۇنى 00.20-تە Satbayev University ماڭىندا بولعان.

ۋفا تۇرعىنى شىرشا تۇبىنەن ۇيىقتاپ جاتقان ەر ادامدى تاۋىپ العان 

«ايف-ۋفا» گازەتىنىڭ حابارلاۋىنشا، ە. ريازانوۆتىڭ «تاعدىر تالكەگى نەمەسە جەڭىل بۋىڭىزبەن» فيلمىندەگى وقيعا باشقۇرتستان تۇرعىنى البينا ماركوۆانىڭ ۇيىندە قايتالانعان.

تاڭەرتەڭ كۇيەۋىن جۇمىسقا شىعارىپ سالعان البينا ەسىكتى جاۋىپ، دۋشقا كىرگەن. دۋشتان شىققاندا، ۇلى پاتەرگە بەيتانىس ەر ادامنىڭ كىرگەنىن جەتكىزگەن. ول قوناق بولمەدەگى شىرشانىڭ تۇبىندە ۇيىقتاپ قالعان.

البينا ۇلىن الىپ، جۋىنۋ بولمەسىنە جاسىرىنعان جانە كۇيەۋىنە حابارلاسقان. كۇيەۋى كۇتپەگەن قوناقتى وياتۋعا تىرىسقان ءبىراق قوناقتىڭ سويلەيتىن شاماسى بولماعان. سومكەسىنەن مەديتسينالىق وقۋ ورنىنىڭ 4-كۋرس ستۋدەنتىنىڭ سىناق كىتاپشاسى تابىلعان. وقيعادان سوڭ، البينا جاس جىگىتتىڭ ينستاگرامداعى پاراقشاسىن تاپقان جانە ستۋدەنتتىڭ تۇنگى كلبۋتارعا ءجيى باراتىنىن كورىپ، پاتەردى نەلىكتەن شاتىستىرىپ العانىن تۇسىنگەن.

ا ق ش- تا ەگىزدەر ءتۇرلى جىلدارى دۇنيەگە كەلدى

جاڭا جىلدا كاليفورنيا اۋرۋحاناسىندا ەگىزدەر اراعا 20 مينۋت سالىپ، ءتۇرلى ايدا جانە ءتۇرلى جىلدا دۇنيەگە كەلدى، دەپ جازدى «يزۆەستيا» باسىلىمى.

امەريكالىق ب ا ق- تىڭ حابارلاۋىنشا، حواكين جانە ايتانا دە حەسۋس ونتيۆەروستار دەلانو قالالىق اۋرۋحاناسىندا تۋعان. العاشقى ءسابي - ۇل بالا 2017 -جىلدىڭ 31 -جەلتوقسانىندا جەرگىلىكتى ۋاقىتپەن 23:58-دە تۋسا، ونىڭ سىڭار قارىنداسى 20 مينۋتتان كەيىن، 1 -قاڭتاردا 00:16-دا جارىققا كەلگەن.

شاقالاقتاردىڭ اتا-اناسى - ماريا مەن ونىڭ كۇيەۋى حواكين ەرليمات قالاسىندا تۇرادى. ولاردىڭ ءۇش قىزى بار.

يتاليادا ساۋدا ورتالىعىنداعى شىرشا ۇرلاندى

 

نەاپولدىڭ تانىمال ساۋدا ورتالىقتارىنىڭ بىرىندە سالتاناتتى تۇردە اشىلعان جاڭاجىلدىق شىرشا ءبىر تاۋلىكتەن كەيىن قولدى بولدى، دەپ جازادى korrespondent.net.

Umberto I گالەرەياسىندا Gran Caffe Gambrinus سىيلاعان جاڭاجىلدىق شىرشانى ۇرىلار ارامەن كەسىپ اكەتكەن. ورنىندا اسەم شىرشانىڭ بىرنەشە بۇتاعى مەن اۋدارىلعان توستاعانى عانا قالعان.

يشينەۆتە «جالاڭاش» شىرشا ورناتىلدى

 

كيشينەۆتە كارپاتتان جەتكىزىلگەن شىرشا ءۇشىن جانجال تۋىندادى، دەپ حابارلايدى strana.ua. دۇرىس جەتكىزىلمەۋ كەسىرىنەن اعاشقا قاتتى زاقىم كەلگەن. كەي بۇتاقتارىن جۇمىسشىلار كەدەرگى كەلتىرمەسىن دەپ، كەسىپ تاستاعان. تۇرعىنداردىڭ نارازىلىعىنان سوڭ، قالا بيلىگى شىرشانى اۋىستىردى. ءبىراق، جاڭا شىرشا داۋعا ۇشىرادى، سەبەبى اعاشتى بالاباقشا اۋماعىنان كەسىپ اكەلگەن.