قازاق قىزى الەمدىك جۇلدىزدىڭ جەكە ۆيزاجيسى اتاندى
قازاقپارات تىلشىسىنە ۆيزاجيست الەمدىك دەڭگەيدەگى جۇلدىزبەن قالاي تانىسقانىن ايتىپ بەردى.
«وتكەن جىلدىڭ قاڭتار ايىندا C. C. Catch الماتىعا ۇشىپ كەلدى جانە ونىڭ وكىلدەرى ۆيزاجيست ىزدەپ جاتقانىن حابارلادى. بىرنەشە ادامنىڭ جۇمىستارىن قاراپ كورگەن ءانشى مەنى تاڭداپتى. وسىلايشا، Ritz-Carlton قوناق ۇيىنە كەلىپ، انشىمەن العاش رەت جۇمىس ىستەدىم. سودان بەرى، ءانشى الماتىعا كەلگەن سايىن ماكياج جاساپ ءجۇردىم. قىركۇيەك ايىندا ءانشىنىڭ جەكە ءۆيزاجيسى بولۋ تۋرالى ۇسىنىس كەلىپ ءتۇستى، مەن كەلىسىمىمدى بەردىم. ەندى الەمنىڭ بىرنەشە مەملەكەتتەرىنە ساپارلايتىن بولامىز»، - دەيدى س. بەكسىرعا.
ساندۋعاش تانىمال ءانشى تۋرالى ءوز اسەرىمەن ءبولىستى.
«كارولينا الەمدىك جۇلدىز جانە وتە قاراپايىم جان. ونىڭ قوس-قوستان كومەكشىلەرى جوق، ءتىپتى كيىمىن ءوزى ۇتىكتەپ كيەدى. اندەرىن جاندى داۋىستا ورىندايدى جانە ءبىر كەشتە 13 انگە دەيىن شىرقاي الادى. ءار نومىرىنە جاۋاپكەرشىلىكپەن قاراپ، ساحناعا شىققانشا تاعات تاپپايدى. ءبىزدىڭ قازاقستاندىق جۇلدىزدار ودان كوپ نارسە ۇيرەنەر ەدى»، - دەيدى ۆيزاجيست.
سونداي-اق، ستيليست الداعى جوسپارلارىن ايتىپ، 2018 -جىلدىڭ باستى ترەندتەرىن اتادى.
«جاڭا 2018 -جىلدىڭ باستى قاعيداسى - مينيماليزم مەن ۇستامدىلىق بولماق. بەتتى ارلەگەندە دە تابيعيلىقتى بارىنشا ساقتاۋعا تىرىسىڭىز، قويۋ تۇستەردى ازىراق قولدانعان ءجون. كيىمگە كەلەر بولساق، التىن تۇستەس رەڭك بەرەتىن قىزىل ءتۇس سانگە اينالادى»، - دەيدى س. بەكسىرعا.
