ا ق ش- تاعى نياگارا سارقىراماسى مۇز بولىپ قاتتى

 استانا. قازاقپارات - ا ق ش سولتۇستىگىندەگى اياز سالدارىنان كانادامەن شەكاراعا جاقىن ورنالاسقان نياگارا سارقىراماسى مۇز بولىپ قاتتى، دەپ حابارلايدى CNN سايتى.

سارقىرامادان اققان سۋدىڭ تەك كەي بولىگى مۇز بولىپ قاتقان. دەسە دە، سۋدىڭ جەرگە تيمەي جاتىپ قاتاتىنى راس. مىڭداعان تۋريست نيۋ- يورك شتاتىنا كەلىپ، مۇزدان جاسالعان تاڭعاجايىپتى سۋرەتكە ءتۇسىرىپ كەتىپ جاتىر.

ارتىنشا تۋريستەردىڭ بارلىعى اتالعان سۋرەتتەرى مەن ۆيدەولارىن الەۋمەتتىك جەلىدە جارىسا بولىسۋدە. مۇز بولىپ قاتقان سارقىراما «حرونيكي نارني» فيلمىندەگى كورىنىسكە ۇقسايدى.

سينوپتيكتەردىڭ بولجاۋىنشا، جاڭا جىلدىڭ العاشقى دەمالىسىندا 220 ميلليون امەريكالىق ايازدىڭ قۇرساۋىندا قالىپ قويماق. كۇن جىلىنباعان جاعدايدا نياگارا سارقىراماسى تولىقتاي مۇز بولىپ قاتۋى مۇمكىن. ءدال وسىنداي جاعداي 2015 -جىلى بولعان ەدى.

Baq.kz