ۇلكەن ەكراننىڭ كىشكەنتاي جۇلدىزى - فوتو
بالالارىمىزدىڭ باعىنا قاراي، ءبىزدىڭ ەلىمىزدە جاس ورەندەر ءۇشىن وسىناۋ بىرەگەي مۇمكىندىك Balapan ارناسىندا بەرىلىپ وتىر. بۇگىنگە دەيىن ارنا تەلەەكراننىڭ ءبىرشاما جۇلدىزدارىن تاربيەلەپ شىعاردى. وسى رەتتە كوپ جۇلدىزدىڭ بىرىنە اينالعان ريزا دانيار تۋرالى سىزدەرگە اڭگىمەلەپ بەرۋدى ءجون كورىپ وتىرمىز.
ءبىرى قىزىعى، ريزا بار بولعانى 9 جاسىندا تەلەۆيدەنيەگە كەلگەن. ال قازىر ونىڭ جاسى 14 تە. بالا بولسا دا، بەس جىلدىق ەڭبەك ءوتىلى جاس ورەندى ايتارلىقتاي شىڭداعان ەكەن. قازىرگى ۋاقىتتا ونى كوشەدەن بايتانىس بالالار مەن ونىڭ اكە-شەشەلەرى تانىپ قوياتىن كورىنەدى. بالا بولسا دا، جۇمىسىنا بارىنشا زور جاۋاپكەرشىلىكپەن قارايتىن ريزا ءارقاشان كەز كەلگەن تاقىرىپقا شىعارماشىلىق تۇرعىدا كىرىسەدى.
«مەنىڭ ەڭ ءبىرىنشى تەلەباعدارلامام «ءبىز باقىتتى بالامىز» دەپ اتالعان بولاتىن. ءاۋ باستا مەنى كاستينگكە شاقىردى. العاشىندا وتپەي قالسام دا، ءوز-ءوزىمدى مۇقاتپاي تىڭعىلىقتى تۇردە دايىندالا باستادىم. ەكىنشى رەتتە بايقاۋدان وسىلايشا ءوتىپ كەتتىم. ودان كەيىن دايارلىق جۇمىسى جۇرگىزىلدى دە، مەنى ەفيرگە دايارلاي باستادى. البەتتە، العاشىندا قورقىنىشىم باسىم بولعان ەدى. ءبىراق، 7 كۇندىك تىنىمسىز ازىرلىك پەن مامانداردىڭ تالىمىنەن كەيىن ءوز- وزىمە دەگەن سەنىمىم نىعايا ءتۇستى»، - دەيدى ريزا.
بۇگىنگى تاڭدا ريزا - بالالار ارناسىنىڭ ەڭ تاجىريبەلى جۇرگىزۋشىلەرىنىڭ ءبىرى.
«مەن ەڭ العاشقى ەفيرىمدى باق-باق اتتى كەيىپكەرمەن بىرگە جۇرگىزدىم. ول سويلەي الاتىن قۋىرشاق ەدى. ارينە، قاتەلىكتەردى ءوزىم دە بايقايتىن ەدىم. ءبىراق، كەلەسى ەفيرگە دەيىن وسى ولقىلىقتاردىڭ ورنىن تۇزەۋگە تىرىسىپ باقتىم»، - دەيدى ريزا.
بەس جىلدىق ەڭبەك بارىسىندا قىزىق جاعدايلار دا كەزدەسكەن كورىنەدى.
«ءبىزدىڭ رەداكتورلار ءبىزدى سوزبەن قولداپ تۇرۋ ءۇشىن قۇلاعىمىزعا قۇلاققاپ كيگىزەدى. كەيدە سول قۇلاققاپتار ءتۇسىپ قالاتىن كەزدەر دە بولادى. ءتىپتى ءبىر كۇنى مەن ەفيردىڭ باستالىپ كەتكەنىن بايقاماي قالىپ، كورەرمەندەرىم ءسوزىمدى ەستىپ قويدى. ءبىراق، وعان ۇيالىپ قالماي، جۇمىسىمدى جالعاستىرا بەردىم»، - دەيدى ول.
ريزا قازىردەن باستاپ ءارتىس نەمەسە ءتىلشى بولۋدى ارماندايدى ەكەن. تەلەكانالدىڭ باس رەداكتورى ايگەرىم بالعابايدىڭ ايتۋىنا قاراعاندا، ريزا تەڭدەسى جوق كادر، ءسوزسىز ەڭ مىقتى جۇرگىزۋشىلەردىڭ ءبىرى بولىپ تابىلادى.
«ءبىزدىڭ وتباسىمىزدا ءتىلشى جوق. انام پسيحولوگ بولسا، اكەم «استانا سۋ ارناسى» مەكەمەسىندە ەڭبەك ەتەدى. تەلەباعدارلامالاردى جۇرگىزۋ ۇنايتىندىقتان، تەلەۆيدەنيەگە ءوزىم باردىم»، - دەيدى وقۋشى.
ابىروي-اتاقتى كوتەرۋ بالا تۇگىلى، ەرەسەكتەردىڭ وزىنە دە وڭاي ەمەس. «جۇلدىزدى اۋرۋ» دەگەن تۇسىنىككە قالاي قارايسىڭ دەگەن سۇراققا ريزا كۇلىمدەپ قانا جاۋاپ بەردى.
«البەتتە، ودان اۋلاقپىن. مەنى مەكتەپتە ءبارى بىلەدى. كەيدە «بالاپان» دەپ تە اتايدى. ءبىراق، ونىڭ بارىنە الدەقاشان بويىم ۇيرەنىپ كەتكەن. ءوزىمدى ەشكىمنەن ارتىق سانامايمىن»، - دەيدى ول.
وقۋ مەن تەلەۆيدەنيەدەن بولەك، ريزا دومبىرا ۇيرەنۋ ۇيىرمەسىنە، تۇرىك ءتىلىنىڭ كۋرسى مەن ۆولەيبول ۇيىرمەسىنە بارادى ەكەن.
«ءاۋ باستا مەن وعان كوپ اقىل ايتاتىنمىن. سەبەبى، كاسىپتىڭ قىر-سىرىن مەڭگەرۋ كەرەك بولاتىن. بۇكىل الەمدىك بالالاردى قورعاۋ كۇنى «Qazaqstan» ۇلتتىق ارناسىندا بەلگىلى جۇرگىزۋشى لامبريان توپۋزيديسپەن بىرگە ريزا جاڭالىقتار باعدارلاماسىن جۇرگىزدى. ول وتە ەڭبەكقور»، - دەيدى ايگەرىم بالعاباي.
ونىڭ ايتۋىنشا، تەلەارنادان وسى ۋاقىتقا دەيىن ايتارلىقتاي كوپ جۇرگىزۋشىلەر تۇلەپ ۇشقان.
«ءبىز ءوزىمىز ءتالىم بەرگەن بالالاردىڭ كەتكەننەن كەيىنگى ءومىرىن باقىلاپ جۇرەمىز. 7 جىلدىق جۇمىس بارىسىندا ءبىرشاما جۇرگىزۋشىلەرىمىز ءوسىپ، جەتىلىپ، كەيبىرى تىلشىلىك ءومىردى تاڭداسا، كەيبىرى تابىستى تۇردە ءبىزدىڭ رەسپۋبليكالىق ارنالاردا ەڭبەك ەتىپ ءجۇر. ءبارى دە ءبىزدىڭ ارناداعى تاجىريبە ولارعا زور كومەك بولعانىن ايتىپ جۇرەدى»، - دەيدى ايگەرىم بالعاباي.
اۆتور: ايان بەكەن ۇلى
