عالىمدار سەمىزدىكتىڭ ەل بىلمەگەن قاۋپىن اشتى

 استانا. قازاقپارات - ا ق ش عالىمدارى سەمىزدىكتىڭ قان تۇزەتىن ءتىن جاسۋشالارىنا كەرى اسەر ەتەتىنىن انىقتادى.

زەرتتەۋ قورىتىندىسى Journal of Experimental Medicine باسىلىمىندا جاريالاندى. تىشقاندارعا تاجىريبە جاساۋ ارقىلى زەرتتەۋشىلەر سەمىزدىكتىڭ گەموپوەتيكالىق ءتىن جاسۋشالارىنا نەمەسە گەموتسيتوبلاستتارعا اۋىرتپالىق تۇسىرەتىنىنە كوز جەتكىزدى. بۇل جاسۋشالار كوپتەگەن سۇيەك قۋىسىنداعى قىزىل ۇلپادا ورنالاسادى. سەمىزدىككە شالدىققان تىشقانداردىڭ جاسۋشا قۇرىلىمى وزگەرىپ، ولاردىڭ ۇزاق مەرزىمدى جۇمىسىنا كەدەرگى بولعان. وسىدان كەيىن عالىمدار تىشقانداردى ارىتىپ، قالىپتى سالماققا جەتكىزگەنىمەن قۇرىلىمدىق وزگەرىستەردىڭ ءبىر بولىگى ساقتالىپ قالعان.

 ەڭبەك اۆتورلارى مۇنى Gfi1 گەنىنىڭ جوعارى ەكسپرەسسيالىعىمەن بايلانىستى دەگەن وي ءتۇيدى. ءوز كەزەگىندە بۇعان اعزا سەمىزدىككە شالدىققاندا پايدا بولاتىن توتىقتىرعىشتىق كۇيزەلىسكە اكەپ سوقتىرادى ەكەن. عالىمدار بۇل جاڭالىق ءارى قاراي ادامنىڭ تاماقتانۋى قان جاسۋشالارىنىڭ ءتۇزىلۋى مەن قاننىڭ بۇزىلۋىنا قالاي اسەر ەتەتىنىن انىقتاۋعا مۇمكىندىك بەرەدى دەگەن ويدا.

Massaget.kz