رەسەيگە جالعا بەرىلگەن بايقوڭىردىڭ بولاشاعى قانداي

استانا. قازاقپارات - ق ر قورعانىس جانە اەروعارىش ونەركاسىبى مينيسترلىگى «بايقوڭىر» عارىش كەشەنىن دامىتۋدىڭ قازىرگى جاعدايى تۋرالى بايانداپ بەردى، دەپ حابارلايدى قازاقپارات.

سوڭعى جىلدارى «بايقوڭىر» كەشەنى بويىنشا قازاقستان- رەسەي ۇكىمەتارالىق كوميسسيانىڭ (ۇ ا ك) اياسىندا رەسەي تاراپىمەن بىرگە «بايقوڭىر» كەشەنىن دامىتۋ ماسەلەسى بويىنشا ۇلكەن جۇمىستار اتقارىلدى.

سونىڭ ىشىندە، «بايقوڭىر» عارىش ايلاعىندا «زەنيت- م» عارىشتىق زىمىران كەشەنىنىڭ (42، 43 جانە 45 الاڭدار) جەرۇستى عارىشتىق ينفراقۇرىلىمى بازاسىندا سپۋتنيكتەردى ۇشىرۋمەن قاتار، زاماناۋي ترانسپورتتىق باسقارىلاتىن عارىشتىق كەمەلەردى ۇشىرۋ مۇمكىندىگى بار «بايتەرەك» عارىشتىق زىمىران كەشەنىن بىرلەسىپ قۇرۋ بويىنشا جۇمىستار جۇرگىزىلۋدە. رەسەي تاراپى «بايتەرەك» جوباسى ءۇشىن «سويۋز-5» ورتا كلاسستاعى زاماناۋي زىمىران- تاسىعىشتى قۇرۋ ءۇشىن جاۋاپ بەرەدى (بۇگىنگى كۇنى زىمىران- تاسىعىشتىڭ ەسكيزدىك جوباسىن ازىرلەۋى اياقتالۋدا)، قازاقستان تاراپى «زەنيت- م» عارىشتىق زىمىران كەشەنىنىڭ بازاسىندا جەرۇستى ينفراقۇرىلىمدى قۇرۋعا جاۋاپ بەرەدى.

ەسكە سالساق، 2017 -جىلدىڭ 27 -ماۋسىمىندا ۇ ا ك ءتوراعالارى - ق ر پرەمەر-ءمينيسترىنىڭ ءبىرىنشى ورىنباسارى ا. مامين مەن رف ۇكىمەتى ءتوراعاسىنىڭ ورىنباسارى د. روگوزين «زەنيت- م» عارىشتىق زىمىران كەشەنىنىڭ جەرۇستى عارىشتىق ينفراقۇرىلىمى نىساندارىن رەسەي فەدەراتسياسى جالعا العاندار قۇرامىنان شىعارىپ، ولاردى قازاقستان رەسپۋبليكاسىنا بەرۋ تۋرالى شەشىمدى بەكىتتى.

بۇل شەشىمگە سايكەس، 2018 -جىلى «بايقوڭىر» عارىش ايلاعىنىڭ 42، 43 جانە 45 الاڭدارىندا ورنالاسقان «زەنيت- م» عارىشتىق زىمىران كەشەنىنىڭ نىساندارىن قازاقستانعا بەرۋ بويىنشا جۇمىستار جۇرگىزىلەدى جانە جەرۇستى ينفراقۇرىلىمدى قۇرۋ بويىنشا جۇمىستار باستالاتىن بولادى. «بايتەرەك» عارىشتىق زىمىران كەشەنىن قۇرۋ جوباسى اياسىندا ءبىرىنشى زىمىران- تاسىعىشتى ۇشىرۋ 2022 -جىلعا جوسپارلانعان.

اتاپ ايتقاندا، «بايقوڭىر» كەشەنىندەگى كەلەشەكتەگى ىنتىماقتاستىق تۇجىرىمداماسى دايىندالىپ، بەكىتىلگەن بولاتىن.

«تۇجىرىمدامانىڭ نەگىزگى ەرەجەلەرى «بايقوڭىر» كەشەنى بويىنشا جالعا الۋ قاتىناستاردى ساقتاي وتىرىپ، كەيبىر نىسانداردى جاڭا عارىشتىق نەمەسە باسقا جوبالاردا پايدالانۋ، الەۋمەتتىك- مادەني نەمەسە باسقا ماقساتتاعى نىساندارعا قايتا بەيىمدەۋ ماقساتىندا ولاردى جالعا الۋدان شىعارۋ، سونداي-اق ەسەپتەن شىعارۋ مەن كادەگە جاراتۋ رۇقسات ەتىلەدى.

قازاقستان مەن رەسەي «بايقوڭىر» كەشەنىنىڭ دامۋىن قارجىلاندىرادى، ونىڭ ىشىندە جاڭا نىساندار سالۋ جانە ينفراقۇرىلىمىن جاڭعىرتۋ جۇمىستارى جۇرگىزىلەدى. وسى ماقساتتا تۇجىرىمدامانى ىسكە اسىرۋ بويىنشا جيىنتىق جوسپار جوباسى مەن بايقوڭىر قالاسىن دامىتۋدىڭ 2018-2035 -جىلدارعا ارنالعان ۇزاق مەرزىمدى بىرلەسكەن باعدارلاماسىنىڭ جوباسى ازىرلەنىپ، قازىرگى ۋاقىتتا ونى بەكىتۋ بويىنشا جۇمىستار جۇرگىزىلۋدە»، - دەپ اتاپ وتىلگەن مينيسترلىكتىڭ «قازاقپارات» اگەنتتىگىنە بەرگەن مالىمەتىندە.