گەرمانياعا قونىس اۋدارعان وتباسى قازاق حالقىن جاڭا جىل مەرەكەسىمەن ارنايى قۇتتىقتادى

استانا. قازاقپارات  - ۇلان- بايتاق ۇلى دالانى مەكەندەگەن قازاق حالقىن قاراپايىم ەتنيكالىق نەمىس وتباسى جاڭا جىل مەرەكەسىمەن ارنايى قۇتتىقتايدى.

بەرلين قالاسى ماڭىنداعى شاعىن اۋداندا تۇراتىن جەتپىس جەتى جاستاعى ياكوۆ نۋس -  قازاق ءتىلىن جەتىك بىلەتىن نەمىس اقساقالى. ياكوۆ نۋس اقساقالدى گەرمانياداعى جەرگىلىكتى قازاقتار ەكىنشى گەرولد بەلگەر دەپ اتايدى.

جامبىل ءوڭىرىنىڭ اقكول اۋىلىندا قازاقتىڭ قالىڭ ورتاسىندا وسكەن نەمىس ازاماتى قازاقتىڭ ءتىلىن جەتىك بىلەدى. سوعىستىڭ اۋىر جىلدارىن، اشتىقتىڭ زاردابىن ءوز كوزىمەن كورگەن قاريا كەزىندە ساقپاندا قوي باعىپ، وگىزگە جەگىلگەن سوقامەن تالاي جەر جىرتقان. قازىر ول ءوزىنىڭ تاريحي وتانىندا تۇرادى، «الايدا جۇرەگىم قازاقستان دەپ سوعادى»، -  دەيدى ول.

 ياكوۆ نۋس، بەرلين قالاسىنىڭ تۇرعىنى:

  - ەش ۋاقىتتا، ەشقانداي جامان ءسوز ەستىگەن ەمەسپىن. سودان بەرى قازاق ەلىنە ءبىر گرام دا وكپەم جوق. مەن ءوزىمدى ايتىپ وتىرمىن، ەگەر دە قازاق بولماعاندا، سوعىس جىلدارىندا اشتان ءولىپ قالاتىن ەدى. ايتپەسە ول ۋاقىتتا قازاقتاردىڭ وزدەرى وتە كەدەي بولعان. ءبىراق ءبىر جاپىراق نان بولسا دا، ونى جارتىلاي ءبولىپ بەرەتىن.

اقساقالدىڭ جارى ليۋبوۆ اپاي دا قازاقتاردى، قازاقستاندى قاتتى ساعىنىپ ءجۇر ەكەن. ءوز ۇيىنە كەلىپ تۇرعان قازاقتىڭ قىزىن كورە سالا كوز جاسىنا ەرىك بەرىپ، جۇرەگى بوساپ كەتتى. ليۋبا اپاي دا سانالى عۇمىرىنىڭ 40 جىلىن قازاقستاندا، سوكولوۆ- سارىباي تاۋ- كەن بايىتۋ كومبيناتىندا قىزمەت اتقارىپ وتكىزگەن. گەرمانياعا كوشىپ كەتكەن قاريالار كۇن سايىن ەلدەن حابار الىپ تۇراتىن كورىنەدى. قازاقستاننىڭ مەملەكەت رەتىندە قول جەتكىزگەن ءار جەتىستىگى نەمىس اۋلەتىن شىن قۋانتادى.

ليۋبوۆ نۋس، بەرلين قالاسىنىڭ تۇرعىنى:

 - قازاق حالقىنىڭ جەتكەن جەتىستىكتەرى جايلى جاڭالىق جىراقتا جۇرسەك تە ءبىزدى قاتتى قۋانتادى. الەمگە ايگىلى استانا قالاسىنا قاراپ دا قۋانامىز. قازاق حالقىنا جانە ونىڭ باسشىسىنا بەيبىت ءومىر تىلەيمىز، الەمدە ەشقاشان سوعىس بولماسىن. مەن بىلەتىن قازاق ۇلتى -  دوستىقتى سۇيەتىن وتە مەيىربان حالىق.

ياكوۆ اتاي ءار ەكى جىلدا ءبىر رەت قازاقستانعا ۇشىپ بارىپ، ساعىنىشىن باسىپ تۇرادى ەكەن. «الايدا سوڭعى كەزدە دەنساۋلىعىم سىر بەرىپ، تۋعان اۋىلىما جەتە الماي، كوڭىلىم قۇلازىپ ءجۇر» دەگەندى ايتادى ول. كوپتى كورگەن قاريا وسكەلەڭ نەمىس ۇرپاعىنا ارناپ، قازاق حالقى جايلى كىتاپ جازىپ جاتقانىن ايتادى. ءوز ەڭبەگىندە ول قازاقتاي حالىقتىڭ دالاداي دارحان كوڭىلى مەن مەيىرىمدى ادامدارى جايلى ايتىپ بەرمەك.

www.24.kz