ا ق ش اسكەري جاتتىعۋدان باس تارتپايتىنىن مالىمدەدى

استانا. قازاقپارات - وڭتۇستىك كورەياداعى قىسقى وليمپيادا كەزىندە بىرلەسكەن اسكەري وقۋ- جاتتىعۋدى توقتاتا تۇرۋ ا ق ش- تىڭ جوسپارىندا جوق. ەلدىڭ قورعانىس ءمينيسترى دجەيمس مەتتيس وسىلاي دەپ مالىمدەدى.

ونىڭ ايتۋىنشا، ماسەلەنى قوس تاراپ بىرلەسە تالقىلاۋى ءتيىس. ءبىراق قازىر وعان قاتىستى ەشقانداي ديپلوماتيالىق شەشىم قابىلدانباعان. ايتا كەتەيىك، وتكەن ايدا سەۋل قۇراما شتاتتارعا وليمپيادا كەزىندە بىرلەسكەن جاتتىعۋدى وتكىزبەۋ تۋرالى ۇسىنىس جاسايتىنىن مالىمدەگەن. ويتكەنى سەۋل مۇنداي ارەكەت سولتۇستىك كورەيانى ارانداتۋشىلىققا يتەرمەلەپ، حالىقارالىق شارانىڭ وتۋىنە كەرى اسەرىن تيگىزەدى دەپ تۇسىندىرگەن ەدى. ال ا ق ش پەن وڭتۇستىك كورەيا جىل سايىن اقپان- ناۋرىز ايلارىندا ەكى ءىرى وقۋ- جاتتىعۋ وتكىزەدى. سوڭعى جىلدارى بۇل شارالارعا 300 مىڭعا جۋىق سارباز قاتىسقان.

www.24.kz