يراندا بىرنەشە كۇن بۇرىن باستالعان ەرەۋىلدەر تەگەرانعا جەتتى

استانا. قازاقپارات - يرانداعى احۋال ۋشىعىپ بارادى. مۇندا ءۇش كۇن بۇرىن باستالعان ەرەۋىلدەر ەل استاناسى تەگەرانعا دا جەتتى. اشىنعان توپ پوليسەيلەرمەن قاقتىعىسىپ، مەملەكەتتىك نىسانداردى باسىپ الۋعا تالپىنعان. «رەيتەر» اگەنتتىگىنىڭ حابارلاۋىنشا، دورۋد قالاسىنداعى قاقتىعىس كەزىندە ءتارتىپ ساقشىلارىنىڭ وعىنان ەكى ادام قازا تاپتى.

 دەگەنمەن ازىرگە بۇل اقپارات رەسمي راستالعان جوق. جەرگىلىكتى ارنالاردىڭ حابارلاۋىنشا، تۇرعىندار ەلدەگى ءومىر ءسۇرۋ جاعدايىنىڭ ناشارلىعى مەن جەمقورلىققا نارازى. ال ۇكىمەتتەگىلەر ازاماتتاردىڭ بيلىككە قارسى باس كوتەرۋىنە سىرتقى كۇشتەر اسەر ەتتى دەپ وتىر. سوندىقتان ەرەۋىلدەردى زاڭسىز دەپ تانىدى. ءتىپتى ميتينگكە قوسىلۋشىلاردىڭ جولىن بوگەۋ ءۇشىن قوعامدىق كولىكتەردىڭ قاتىناسىن توقتاتتى. ال تەگەران پوليتسياسىنىڭ وكىلى شاھار تولىقتاي ءتارتىپ ساقشىلارىنىڭ باقىلاۋىندا ەكەنىن مالىمدەپ، نارازى توپتىڭ تاراۋىنا كەڭەس بەردى. بۇعان دەيىن بيلىك ەرەۋىلگە باستاماشى بولعان ونشاقتى ادامدى قاماۋعا العان. ءوز كەزەگىندە ا ق ش پرەزيدەنتى دونالد ترامپ يران ۇكىمەتىنىڭ نارازىلىققا شىققاندارعا قارسى قانداي شارا قولداناتىنى الەم ەلدەرىنىڭ نازارىندا ەكەنىن ەسكەرتتى.

www.24.kz