ب ا ق: رەسەي تانكەرلەرى سولتۇستىك كورەياعا مۇناي جەتكىزگەن
ولاردىڭ سوزىنشە، بيىلعى قازان جانە قاراشا ايلارىندا كەمىندە وسىنداي ءۇش وقيعا انىقتالعان. قازاننىڭ 15- ءى كۇنى قيىر شىعىس ايماعىنداعى سلاۆيانكا پورتىنان 1600 توننا مۇناي ونىمدەرىن ارتىپ شىققان «ۆيتياز» تانكەرى، رەسمي قۇجاتتار بويىنشا، جاپون تەڭىزىندە جۇمىس ىستەپ جاتقان بالىق اۋلايتىن شاعىن كەمەلەرگە وتىن جەتكىزۋگە اتتاندى دەپ كورسەتىلگەن. اشىق تەڭىزگە شىققاننان كەيىن ءبىرشاما ۋاقىت وتكەندە تانكەردىڭ قاي جەردە ەكەنىن بەلگى بەرىپ كورسەتەتىن ترانسپوندەردى اجىراتىپ تاستاعان.
باتىس بارلاۋ قىزمەتىنىڭ دەرەكتەرى بويىنشا، رەسەيلىك كەمەدەگى جۇكتى سولتۇستىك كورەيانىڭ San Ma 2 تانكەرى قابىلداپ العان. «ۆيتياز» جۇك كەمەسىنىڭ يەسى بۇل وپەراتسيا تۋرالى ەشتەڭە بىلمەيتىنىن، سونىمەن بىرگە تانكەردىڭ بالىقشىلار كەمەلەرىنە وتىن اپارا جاتقانىنان دا حابارسىز ەكەنىن مالىمدەگەن. سپۋتنيكتىك باقىلاۋ جانە وزگە دەرەك كوزدەرى ارقىلى الىنعان مالىمەتتەردە قازان- قاراشا ايلارىندا رەسەيلىك تانكەرلەردىڭ وسىنداي تاعى ەكى وپەراتسيانى ىسكە اسىرعان ايتىلعان.
سولتۇستىك كورەياعا مۇناي جانە مۇناي ونىمدەرىن ساتۋ وسى ەلگە قارسى ب ۇ ۇ قاۋىپسىزدىك كەڭەسى قارارىمەن سالىنعان سانكسيانى بۇزۋدى بىلدىرەدى. Reuters اگەنتتىگى سۇحباتتاسقانداردىڭ پىكىرىنشە، مۇناي جانە مۇناي ونىمدەرىن ساتۋ رەسەي بيلىگىنىڭ نازارىنان تىس جاسالعان بولۋى مۇمكىن. قىركۇيەك ايىندا رەسەيدىڭ پريمورە ولكەسى مەن سولتۇستىك كورەيانىڭ پورتتارى اراسىندا سولتۇستىك كورەيالىق تانكەرلەر قاتىناپ جۇرگەنى تۋرالى اقپارات پايدا بولعان. كەيىن ونداي بايلانىس توقتاعان. سوڭعى ايلاردا سولتۇستىك كورەيا كەمەلەرى اشىق تەڭىزدە كونتراباندالىق جۇك قابىلدايتىنى تۋرالى ايتىلا باستاعان.
رەسەي سىرتقى ىستەر مينيسترلىگى مەن كەدەن قىزمەتى بۇل اقپاراتتارعا بايلانىستى كوممەنتاري بەرۋدەن باس تارتتى.
پحەنيان ونەركاسىبىنە، سونىمەن بىرگە، ب ۇ ۇ قاۋىپسىزدىك كەڭەسىنىڭ سالعان تىيىمىنا قاراماستان وسى ۋاقىتقا دەيىن جالعاستىرىپ وتىرعان ءوزىنىڭ يادرولىق جانە زىمىران باعدارلامالارىنا قاجەتتى مۇناي مەن مۇناي ونىمدەرىن شەتتەن اكەلەدى.
www.azattyq.org
