15:27, 31 - جەلتوقسان 2017 | GMT +5
سولتۇستىك كورەيا يادرولىق قۋاتىن ەسەلەي بەرەتىنىن مالىمدەدى
استانا. قازاقپارات - سولتۇستىك كورەيا وكىمەتى يادرولىق كۇش- قۋاتىن ارتتىرۋ جوسپارىنان باس تارتپاق ەمەس. بۇل تۋرالى مالىمدەمەنى وسى ەلدىڭ مەملەكەتتىك ورتالىق تەلەگراف اگەنتتىگى تاراتتى.
«ا ق ش پەن ونىڭ جاندايشاپتارى تاراپىنان يادرولىق قاۋىپ جانە بوپسا قالىپ وتىرعان كەزدە ءبىز قورعانىس قۋاتىمىزدى جانە الدىن الا سوققى بەرۋ قابىلەتىمىزدى ەسەلەي بەرەمىز» دەلىنگەن بيلىك مالىمدەمەسىندە.
جەلتوقساننىڭ سوڭىندا ا ق ش سولتۇستىك كورەياعا قاتىستى سانكسيالارىن كەڭەيتكەن. بۇدان كەيىن ب ۇ ۇ قاۋىپسىزدىك كەڭەسى پحەنياننىڭ قاراشادا بالليستيكالىق زىمىران سىناعىن وتكىزگەنىنە جاۋاپ رەتىندە سولتۇستىك كورەياعا قارسى جاڭا سانكسيالار ەنگىزگەن.
ب ۇ ۇ قارارىنا سايكەس، سولتۇستىك كورەياعا سىرتتان تاسىمالداناتىن مۇناي ونىمدەرىنىڭ كولەمى وسى كەزگە دەيىنگى كورسەتكىشتەن 85 پايىزعا ازايادى. بۇعان قوسا، ب ۇ ۇ- عا مۇشە بارلىق ەلدەر ءوز تەرريتورياسىندا جۇمىس ىستەپ جاتقان سولتۇستىك كورەيا ازاماتتارىن الداعى ەكى جىلدىڭ ىشىندە تۇگەلدەي وتانىنا قايتارۋى ءتيىس.
