اقىن ايبەك قاليەۆ «ايتىستىڭ اقتاڭگەرى» اتاندى

استانا. قازاقپارات - الماتىدا «تاۋەلسىزدىككە تارتۋ» تاقىرىبىندا وتكەن رەسپۋبليكالىق اقىندار ايتىسىنىڭ باس جۇلدەسىن ايبەك قاليەۆ جەڭىپ الدى، دەپ حابارلايدى «قازاقپارات» ح ا ا ءتىلشىسى.

  رەسپۋبليكالىق اقىندار ايتىسى وڭتۇستىك استاناداعى ستۋدەنتتەر سارايىندا ءوتتى. ەكى كۇنگە سوزىلعان ايتىستىڭ باس جۇلدەسىنە سۋ جاڭا اۆتوكولىك تىگىلگەن بولاتىن. اقىنداردىڭ ءسوز دوداسىن ەلىمىزگە بەلگىلى اسانالى ءاشىموۆ، نۇرتورە ءجۇسىپ، جاناربەك ءاشىمجان، سەرىك قاليەۆ، باۋىرجان حاليوللا مەن داۋلەتكەرەي كاپ ۇلى باعالادى.

ايتىستا الدىنا جان سالماي، باس جۇلدەنى يەلەنگەن ايبەك قاليەۆكە اۆتوكولىك سىيعا تارتىلدى. بۇعان قوسا «اگيگاگىم» اۋەنىمەن اسىقپاي- اق ءسوز اسىعىن الشىسىنان تۇسىرەتىن اقىنعا «ايتىستىڭ اقتاڭگەرى» اتاعى بەرىلدى. ال ءبىرىنشى ورىندى جەڭىپ العان باتىس قازاقستاندىق جانسايا مۋسيناعا 1 ميلليون تەڭگە تابىستالسا، جۇلدەلى ەكىنشى ورىندى يەلەنگەن ەركەبۇلان قاينازار مەن مەيىربەك سۇلتانحانعا 500 مىڭ تەڭگەدەن جۇلدە بەرىلدى. ءۇشىنشى ورىن ءۇش اقىنعا، اتاپ ايتقاندا تىلەگەن ءادىلوۆ، ەرشات قايىرحان مەن حاليجان ءبىلداشقا بۇيىردى.

اۆتور: ايان بەكەن ۇلى