بەرەزوۆ اۋىلى تۇرعىندارى تۇگەلدەي كوشىرىلدى - ب ق و
بۇل ءۇشىن ارالتال اۋىلىندا 100 تۇرعىن ءۇي جانە اقساي قالاسىندا ەكى 153 پاتەرلىك توعىز قاباتتى ءۇي سالىندى. ەلباسى تاپسىرماسىنا سايكەس وبلىس اكىمى التاي كولگىنوۆ اتالمىش اۋىلدار تۇرعىندارىمەن بىرنەشە رەت كەزدەسىپ، كوشىرۋ بارىسىن ۇدايى نازاردا ۇستاپ وتىردى.
ۇيلەردى سالعان كەزدە بەرەزوۆتىقتار مەن بەستاۋلىقتاردىڭ تالاپ- تىلەگى ەسكەرىلدى. ارالتالداعى ۇيلەردىڭ تەڭ جارتىسى 3 بولمەلى (95 شارشى مەتر) ، قالعانى 4 بولمەلى (105 شارشى مەتر) . گازداندىرىلعان ۇيلەرگە تازا جانە تەحنيكالىق سۋ جەتكىزىلگەن، كىرەبەرىس جولدارعا اسفالت توسەلگەن. اۋلادا باۋ- باقشا داقىلدارىن ەگىپ، جەمىس اعاشتارىن وتىرعىزۋعا، قورا- قوپسى سالۋعا بولادى. تۇرعىندارعا قولايلى بولۋى ءۇشىن جاڭا اۆتوبۋس باعىتى اشىلدى. بۇل ۇيلەردىڭ ءبارى «ق پ و ب. ۆ. » كومپانياسىنىڭ قارجىسىنا تۇرعىزىلدى. ارالتالدا سونداي- اق 300 ورىندىق مەكتەپ بوي كوتەردى، ول قاڭتار ايىندا ءوز ەسىگىن ايقارا اشاتىن بولادى.
اقسايدا سالىنعان كوپ قاباتتى ەكى ءۇيدىڭ ءارقايسىسىندا 36 ءبىر جانە سونشا ءتورت بولمەلى، 54 ەكى، 27 ءۇش بولمەلى پاتەرلەر بار. قۇرىلىس كەزىندە پاتەر الاڭى ءبىر ادامعا 15 شارشى مەتردەن كەم بولماۋى ەسكەرىلدى. ۇيلەردە اقسايدا ءبىرىنشى رەت اۆتونومدى قازاندىقتار ورناتىلعان. بالالار ويىن الاڭى قاراستىرىلعان. بۇل ماقساتتا ەۋروپادا كەڭىنەن تارالعان جۇمساق رەزەڭكە جابىن قولدانىلماقشى. اقسايدا وعان قوسا اۋىل تۇرعىندارىنىڭ بالالارى ءۇشىن 320 ورىندىق بالاباقشا پايدالانۋعا بەرىلدى.
بەرەزوۆ جانە بەستاۋ اۋىلدارىنىڭ تۇرعىندارىنا جاڭا ۇيلەردەن بولەك 1 ميلليوننان 15 ميلليونعا دەيىن ماتەريالدىق وتەماقى تولەندى.
ەسكە سالا كەتەيىك، قاراشىعاناق كەنىشى سانيتارلىق قورعاۋ ايماعىنىڭ كەڭەيتىلۋىنە بايلانىستى اتالمىش اۋىل تۇرعىندارىن كوشىرۋ بۇدان ەكى جىل بۇرىن باستالىپ، 82 وتباسى اقسايعا قونىستانعان بولاتىن. كوشىرۋدىڭ ەكىنشى كەزەڭى بيىلعى تامىزدا باستالدى.
اۆتور: ەلجان ەرالى
