قازاقستاندىق ستيليستەردىڭ جاڭا جىل كەشىنە ارنالعان كەڭەستەرى - فوتو
«قازاقپارات» ح ا ا ءتىلشىسى بەلگىلى وتاندىق ديزاينەرلەرمەن جانە ستيليستەرمەن اڭگىمە ءوربىتىپ، كيىم كيگەن كەزدە نەگە ءمان بەرۋ كەرەكتىگىن ءبىلىپ كوردى.
قازاقستاندىق ديزاينەر قۇرالاي نۇرقادىلوۆا جاڭا جىل مەرەكەسىندە ايەلدەرگە جەكە ساندىك ۇمىتپاۋعا كەڭەس بەردى.
«قازىر مودا شىڭىندا بارقىت تۇر. جاڭا جىل كەشىندە وسى ماتادان تىگىلگەن كەز كەلگەن كويلەكتى نەمەسە كوستيۋمدى كيە بەرۋگە بولادى. ال ەگەر اتالعان كيىمدەرمەن بىرگە التىن تۇستەس تۋفلي كيەر بولساڭىز، بۇل تىپتەن كورىكتى كورىنەر ەدى. بارقىتپەن بىرگە پايەتكالى، قۇس ءجۇندى، شاشاق كيىمدەر دە كەرەمەت ترەندتە. پايەتكالار كۇندەلىكتى كيىمدە دە كوپ كەزدەسەدى. ماسەلەن، كوپتەگەن جەمپىرلەر نەمەسە كلاسسيكالىق بەلدەمشەلەر ءار ءتۇرلى ءتۇس پەن گامماداعى پايەتكالارمەن ۇيلەسەدى. كەز كەلگەن كۇلگىن نەمەسە قارا ءتۇستى كيىمدەردى كوكشىل نەمەسە قىزىل تۇسپەن كيۋگە ابدەن بولادى. 2018 -جىلى كەز كەلگەن تۇردەگى نەمەسە نۇسقاداعى تور پىشىندەس كيىمدەر ترەندتە بولادى»، - دەيدى ديزاينەر قۇرالاي نۇرقادىلوۆا.
ال قارا ءتۇستى كيىمدەردىڭ ۇيلەسىمىن جازباي تانيتىن ديزاينەر نايل بايكۇشىكوۆ مەرەكە كەزىندە اشىق ءارى مەيرامعا ساي كيىم كيۋگە كەڭەس بەرەدى. سونىمەن بىرگە، ول ەڭ الدىمەن ءوز ستيلىڭە دەن قويىپ، سوعان باسىمدىق بەرۋدى ءجون دەپ بىلەدى.
«مەرەكەلەردە كوتەرىڭكى كوڭىل- كۇيدى كويلەكتەردەگى پايەتكەلەر سىيلاي الادى. سونىمەن بىرگە، وسى ماۋسىمدا تۇيەقۇس قانات ءپىشىندى كيىمدەر وتە ماڭىزدى بولماق. ءبىر كيىم كيۋ ۇلگىسىنە قاناتتاردى دا، پايەتكالاردى دا سايكەستەندىرۋگە ەشقانداي كەدەرگى جوق - بۇل وتە كەرەمەت كورىنەدى. اشىق تۇستەر البەتتە ترەندتەن قالماق ەمەس. جامىلعىمەن بىرگە كورساجدى كويلەكتەر دە ايەلدىڭ ءوڭىن اشا تۇسەدى. ودان كەيىن ءتىپتى جامىلعىنى دجينسا جانە ىشكويلەكپەن بىرگە casual ستيلىندە كيۋ دە سۇلۋ كورىنەدى. ءبىراق، مەن ترەندتەن گورى ايەلدەردىڭ ءوز ستيلىنە ساي كيىنگەنىن ءجون دەپ بىلەر ەدىم»، - دەيدى نايل.
ونىڭ ايتۋىنشا، قازاقستاندا كەلبەتتى ايەلدەر كوپ. سونداي-اق، ولار جاڭا جىلدا وتە تارتىمدى كيىنۋى ءتيىس.
«مەن ءبىزدىڭ ايەلدەرگە ەڭ الدىمەن ءوزىن- ءوزى ءسۇيۋ كەرەك دەپ تىلەك ايتار ەدىم. قازىرگى ۋاقىتتا قىمبات سالونداردان كيىم ساتىپ الۋعا مۇمكىندىك بولماسا دا، ەڭ باستىسى - ماقساتتى دۇرىس قويا بىلگەن ءجون. ومىرگە وكپە- نازىڭدى ايتا بەرۋگە بولادى. ال قاشان دا ءبارىن دە ءوز قولىڭا الىپ، كۇنى ەرتەڭ كەز كەلگەن كويلەكتى جاسقانباي ساتىپ الاتىنداي جاعدايعا جەتۋ ءۇشىن ومىرگە وزگەرىس ەنگىزۋدى باستاۋ كەرەك»، - دەيدى نايل بايكۇشىكوۆ.
تەلەجۇرگىزۋشى ءارى بىرنەشە برەندتى بۋتيكتەردىڭ يەسى دينارا ءساتجان مەرەكە كەزىندە وتاندىق كيىمدەرگە باسا ءمان بەرۋ كەرەكتىگىن ايتادى.
«بۇرىن ءبارى دە يتالياندىق، پولشالىق، تۇرىك كيىمدەرىنە اسا ىنتىق بولاتىن. كەڭەس كەزىنەن- اق يمپورتتىق كيىمدەردى كيدىڭ بە - وزگەلەردەن كەرەمەت بولعانىڭ دەگەن تانىم- تۇسىنىك قالىپتاسقان. ءبىراق، قازىر ۋاقىت باسقا. ءبىز باسقا بىرەۋلەردەن كوشىرە بەرمەي، ءوزىمىز نارىققا جاڭا ترەندتەردى جاساپ شىعارۋىمىز كەرەك. 26 جىلدىڭ ىشىندە زاۋىت نەمەسە قالالاردى سالىپ قانا قويماي، كيىم تىگۋدى جانە ءساندى كيىنۋدى ۇيرەنگەنىمىز قۋانتادى. مەنىڭشە، ەندى بىرنەشە جىلدان كەيىن ءبىز شەتەلدەن كيىم تاسىماي، ءبارىن دە ءوزىمىز تىگىپ الامىز دەگەن سەنىمىم زور»، - دەيدى دينارا ءساتجان.
استانا قالاسىنداعى شاشتاراز- ستيليست ايزادا تالاسپەكوۆا مەرەكە كەزىندەگى ۇزدىك ۇلگى ءۇشىن قازىردەن باستاپ شاشتىڭ بابىن رەتكە كەلتىرۋى كەرەكتىگىن ەسكەرتەدى.
«بۇگىنگى تاڭدا بارلىق جاعدايدا تابيعيلىق جوعارى باعالانادى. سوندىقتان، جاڭا جىلدىق كەشكە شىعار الدىندا بارىنشا تابيعي كورىنەتىن جاعاجايلىق شاش ۇلگىسىن جاساۋعا كەڭەس بەرەمىن»، - دەيدى ايزادا تالاسپەكوۆا.
مەرەكەلىك ماكياجدىڭ دا ماڭىزى بارشىلىق. استانالىق ۆيزاجيست- ستيليست اجار تورەحاننىڭ ايتۋىنا قاراعاندا، جاڭا جىل كەشىندە وزگەدەن اجارلى كورىنۋ ءۇشىن جارقىن بوياۋلاردان باس تارتۋدىڭ قاجەتى جوق. ەڭ باستىسى، تۇرپايى كورىنبەۋ ءۇشىن باسىمدىقتى دۇرىس قويا بىلگەن ءجون. سونىمەن بىرگە، اجار قازاقستاندىق شوۋ-بيزنەستە جۇرگەن جۇلدىزدارعا تۇراقتى تۇردە حالىقارالىق دارەجەدەگى ۆيزاجيستەردەن كەڭەس الىپ تۇرۋ پايدالى ەكەنىنە سەنىمدى.
«قازىرگى تاڭدا كەشكى قارا مەيكاپ دايىنداۋ كەزىندە بەت تەرىسىنىڭ جارقىراپ تۇرۋىنا نازار اۋدارعان دۇرىس. بۇرىن كۇڭگىرت ءتۇستى پامادالار ترەندتە بولعانىمەن، ولار قازىر ەكىنشى كەزەككە قالىپ بارادى. قازىر مەتالل تۇستەس پامادالار موداعا ەنگەن»، - دەيدى اجار تورەحان.
