شاكارىم قۇدايبەردى ۇلىنا ارنالعان سايت اشىلدى
2018 -جىلى اقىن، اۋدارماشى، سازگەر، تاريحشى، فيلوسوف شاكارىم قۇدايبەردى ۇلىنىڭ تۋعانىنا 160 جىل تولادى.
شاكارىم قۇدايبەردى ۇلى - ابايداي ۇلى ۇستازىنان ءتالىم-تاربيە الىپ، امانات- وسيەتىن ەكى ەتپەي، قازاق ادەبيەتىنىڭ دامۋىنا زور ۇلەس قوسقان اقىن.
شاكارىم قۇدايبەردى ۇلىنىڭ 160 جىلدىق مەرەيتويى قاراساڭىندا «Shakarim.kz» سايتى اشىلدى.
«بوستاندىق تاڭى اتتى» دەپ بارشاعا قۋانا جار سالعان شاكارىمنىڭ ارمانى ورىندالدى. بۇل تەك شاكارىمنىڭ عانا ەمەس بارشا الاش جۇرشىلىعىنىڭ ارمانى ەدى. سوندىقتان سايتتىڭ باس بەتى شاكارىمنىڭ «بوستاندىق تاڭى اتتى» ولەڭىمەن اشىلادى. زامان تالابىنا ساي جاڭا تەحنولوگيالار قارقىندى دامىپ كەلە جاتىر. سوندىقتان مۋزەي سالاسى دا زامان كوشىنە ىلەسىپ، العا جىلجۋى شارت. مۋزەيگە ادامداردىڭ ءجيى كەلۋگە مۇمكىندىگى بولا بەرمەيدى. مۋزەي قورىنداعى اقىن مۇراسىن كەڭىنەن ناسيحاتتاۋ ماقساتىندا ۇسىنىلىپ وتىر.
بۇل سايتتى جاساۋ بارىسىندا كوپتەگەن ماتەريالدار، قۇجاتتار، ارحيۆ دەرەكتەرى جينالدى. ابايدىڭ «جيدەباي- ءبورىلى» مەملەكەتتىك قورىق- مۋزەيىنىڭ قورىندا جىلدار بويى مۇراعاتتار مەن عىلىمي زەرتتەۋلەر بارىسىندا جيناقتالىپ كەلگەن قور ماتەريالدارى، مۋزەي كىتاپحاناسىنا كەلىپ تۇسكەن كىتاپتار مەن مەرزىمدى باسپا ءسوز باسىلىمدارى باسشىلىققا الىندى.
سونداي-اق، مۋزەي قورىنداعى اقىن تۇلعاسى، ونىڭ ءومىرى مەن شىعارمالارى نەگىزىندەگى بەينەلەۋ ونەر تۋىندىلارى جانە شاكارىم اندەرىن وسى سايتتان تابۋعا بولادى.
