الماتىنىڭ مۇز ايدىندارىندا تۇرعىندارعا تاتتىلەر تەگىن تاراتىلدى - فوتو

مەرەكەلىك باعدارلاما اياسىندا اياز-اتا، اقشاقار جانە انيماتورلار بالالاردى قۇتتىقتاپ، ەلىمىزدىڭ بەلدى فابريكالارىنىڭ كونديتەرلىك تاۋارلارىن تابىستادى. قازاقستان كونديتەرلىك اسسوتسياتسياسى «تاقپاق ايتىپ، ءبىر دوربا كامپيت ۇتىپ ال» دەگەن ۇرانمەن كونكي تەۋىپ، سپورتپەن شۇعىلداناتىن قوناقتاردى جاڭا جىلمەن قۇتتىقتادى. ءار تاقپاق ايتقان ءبۇلدىرشىن ءتاتتى سىيلىققا يە بولدى.

«الماتى قالاسى اكىمدىگىنىڭ قولداۋىمەن قايىرىمدىلىق شاراسىن وتكىزۋدەمىز. بۇل شارا قالانىڭ بارلىق تەگىن مۇز ايدىندارىندا تۇنگى ون ەكىگە دەيىن جالعاسادى. قالا تۇرعىندارىن كەلە جاتقان جاڭا جىلمەن قۇتتىقتاپ، ەلىمىزدىڭ كونديتەرلىك فابريكالارىنا وسىنداي مۇمكىندىك ءۇشىن العىسىمدى بىلدىرەمىن. ءبىز سپورتپەن شۇعىلدانىپ، سالاۋاتتى ءومىر سالتىن ۇستاناتىن ازاماتتاردى قولداپ، سىيلىقتار تارتۋ ەتتىك. وسىنداي شارانى مۇز ايدىندارىندا وتكىزگەنىمىز دە سول سەبەپتى. ءبىزدىڭ ءونىم قازاقستاندا عانا ەمەس، ت م د ەلدەرىندە دە تانىمال. سوندىقتان بارلىعىن ۇلتتىق ءونىمدى قولداۋلارىڭىزدى سۇرايمىز»، - دەپ ءبولىستى قازاقستان كونديتەرلىك اسسوتسياتسياسىنىڭ ۆيتسە- پرەزيدەنتى مارلەن ابۋلگازينوۆ.

بۇل شارا بالالاردى كەلە جاتقان جاڭا جىلمەن قۇتتىقتاپ، سپورتقا دەگەن قىزىعۋشىلىقتى ارتتىرۋ ماقساتىندا ۇيىمداستىرىلدى. سونىمەن بىرگە، قازاقستان كونديتەرلىك اسسوتسياتسياسى سىيلىقتاردى، كونديتەرلىك تاۋارلاردى الماتى قالاسىنىڭ بالالار ۇيلەرىنە دە تاراتىپ بەرەدى. ەستەرىڭىزگە سالا كەتسەك، جەلتوقساننىڭ بىرىنەن باستاپ وسىنداي 8 تەگىن مۇز ايدىندارى اشىلعان بولاتىن.