تالدىقورعاندا قاڭعىباس ادامدار جاڭا جىلدى اتاپ ءوتتى

قازىرگى تاڭدا بۇل ورتالىقتى 160-تان استام قاڭعىباس پانالاۋدا. الەۋمەتتىك مەكەمە ۇجىمى ولارعا ارناپ جاڭا جىل شىرشاسىن ۇيىمداستىرىپ، سىيلىقتار تابىستادى.

بيىل بۇل مەكەمەنىڭ اشىلعانىنا 5 جىل تولدى. وسى ۋاقىت ىشىندە 600-دەن استام ادام وسى جەردەن پانا تاۋىپ، قۇجاتىن رەتتەپ، قوعامعا بەيىمدەلدى.

جالپى بۇل جەرگە كەلەتىن ازاماتتاردىڭ تاعدىرى ءارقيلى. ال وسى جىلدان باستاپ تۇزەتۋ مەكەمەلەرىنەن بوساپ شىققان قىلمىسكەرلەردىڭ تۇرعىلىقتى مەكەنجايى بولماسا وسى ورتالىققا جىبەرىلەتىن بولدى. سوندىقتان تۇراقتى مەكەنجايى جوق تۇلعالار سانى كۇرت ءوسىپ كەتتى دەيدى، ورتالىق ديرەكتورى گۇلناز تىلەۋبەرلينوۆا. مەكەمە ماماندارى دەنساۋلىعى جوقتاردىڭ مۇگەدەكتىگىن راسىمدەپ، قۇجاتتارىن جيناپ، زەينەتكەرلەردىڭ زەينەتاقىسىن الىپ بەرۋگە كومەكتەسەدى. جۇمىسقا جارامدىلارىن جۇمىسقا ورنالاستىرادى.

بيىل الەۋمەتتىك بەيىمدەۋ ورتالىعى جاڭا عيماراتقا كوشتى. قاجەتتى كولىك، جيھازبەن قامتاماسىز ەتىلدى.

«سوندىقتان جىلدى قورتىندىلاپ، قاراماعىمىزداعىلاردىڭ كوڭىلىن اۋلاپ، جاڭا جىل كەلگەنىن سەزىنگەنىن قالادىق»، دەپ وي قورىتتى مەكەمە باسشىسى.