داريعا نازاربايەۆا: قازاقستاندا بۇرىن- سوڭدى بولماعان عارىش يندۋسترياسى قالىپتاستى

استانا. قازاقپارات - قازاقستان عارىش تەحنولوگيالارىن ءوندىرۋ ارقىلى قازىناعا قوماقتى قاراجات تۇسىرە الادى. استاناداعى ۇلتتىق عارىش ورتالىعىندا بولىپ قايتقان ق ر پارلامەنتى سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا وسىلاي ءمالىم ەتتى،

 دەپ حابارلايدى «قازاقپارات» ح ا ا ءتىلشىسى.

«مەن بۇگىن ءبىرىنشى رەت ۇلتتىق عارىش ورتالىعىندا بولدىم. بۇعان دەيىن ءبىز تەك قۇجاتتار مەن ەسەپتەردى كورىپ، ستاتيستيكانى عانا تىڭداپ كەلىپ ەدىك. بۇگىن ورتالىقتا كورگەنىمىز ءبىزدىڭ ءبارىمىزدى شىنىندا دا تاڭ قالدىردى. بۇل - قازاقستاندا بۇرىن- سوڭدى بولماعان عارىش يندۋسترياسى. ول بۇگىن بىزدە بار. بۇل ءبىز ايتىپ جۇرگەن «حايتەك» تەحنولوگياسى، بولاشاقتىڭ تەحنولوگياسى. ولاردىڭ قاجەتتىلىگى جىل ساناپ ارتىپ بارادى»، - دەدى سەناتور.

داريعا نازاربايەۆانىڭ ايتۋىنا قاراعاندا، ءبىر سوزبەن، بارلىق مەملەكەتتەر جاڭا يندۋستريا باعىتىندا العا جىلجىپ بارادى.

«بىزگە وسى رەتتە وتە كوپ بىلىكتى ماماندار كەرەك. ءبىزدىڭ عارىش تەحنولوگياسى جىلدام العا كەتىپ بارادى. الداعى 2-3 جىلدا ءبىزدىڭ بارلىق ينفراقۇرىلىمىمىز، سەرۆيستىك قىزمەتتەر تىڭ دەڭگەيگە كوتەرىلەدى. بۇل ءوز كەزەگىندە بيۋروكراتيالىق اپپاراتتىڭ كوپتەپ قىسقارۋىنا اكەلىپ، مەملەكەتتىك اپپاراتتى ۇستاۋدىڭ شىعىنىن تومەندەتەدى. ەكونوميكا ءۇشىن دە بۇنىڭ ماڭىزى زور. دەمەك، شىنىندا دا، عارىش تەحنولوگياسى ۇلكەن سەرپىلىس بەرەدى. بۇگىنگى كۇنى ونىڭ جارقىن ۇلگىسىن ءبىز ۇلتتىق عارىش ورتالىعىنان كورىپ وتىرمىز»، - دەدى ول.

سەناتور ءوز سوزىندە بۇگىنگى كۇنى ولار شەتەلدەن اكەلىپ جۇرگەن مەديتسينالىق پروتەزدەر قازاقستاندا شىعارىلا باستاعانىن مىسال ەتتى. دەمەك، شەتەلدىك يمپورتتىق تاۋاردان 70 پايىزعا ارزان پروتەزدەر ءوز ەلىمىزدە وندىرىلە باستادى.

«وسى رەتتە «بولاشاق» باعدارلاماسى ءوزىنىڭ جەمىسىن بەرىپ جاتقانىن اتاپ وتكىم كەلەدى. ءبىز ۇلتتىق عارىش ورتالىعىندا «بولاشاقتىقتار» - نەگىزگى كادرلار شوعىرى ەكەنىن كورىپ وتىرمىز. «بولاشاق» باعدارلاماسى بويىنشا الەمنىڭ ۇزدىك ج و و- لارىندا تەحنيكالىق ءبىلىم العان جاستار قازىر ەل يگىلىگى ءۇشىن ەڭبەكتەنىپ جاتىر. كادرلاردى ارى قاراي جەتىلدىرە بەرگەن دۇرىس. مەنىڭشە، ءالى دە 10 مىڭ وتە بىلىكتى مامان كەرەك. سوندىقتان، ءبىلىم جۇيەسى وسىعان بەيىمدەلىپ، اتالعان باعىتتا گرانتتار كوپتەپ بولىنۋدە»، - دەيدى ول.

سەناتور ءوز سوزىندە قازاقستاننىڭ عارىش سالاسى ازىرگە شىعىندى ءوندىرىس ەكەنىن، ياعني ينۆەستيتسيا مەملەكەت تاراپىنان قۇيىلىپ جاتقانىن اتاپ ءوتتى.

«ءبىراق، بۇگىنگى كۇننىڭ وزىندە نارىقتا سۇرانىسقا يە ونىمدەر شىعارىلىپ جاتقانىن كورىپ وتىرمىز. ۋاقىت وتە كەلە تاپسىرىس مەملەكەتپەن بىرگە جەكە سەكتوردان ارتا باستاعاننان كەيىن بۇل شىنىندا دا، بيزنەس ءۇشىن تارتىمدى بولا ءتۇسۋى مۇمكىن. سوندا ينۆەستورلار تارتىلۋى ىقتيمال. دەمەك، مەملەكەت شەكسىز اقشا بولە بەرمەيدى. باقىلاۋدى مەملەكەت وزىنە قالدىرىپ، جەكە بەرىك سەرىكتەسپەن جۇمىس جۇرگىزۋگە بولادى. بولاشاق كورسەتەدى. شىنىندا دا، بۇل وتە ەكسپورتتى ءوندىرىس»، - دەيدى داريعا نازاربايەۆا.

اۆتور: ايان بەكەن ۇلى