ءبىرىڭعاي جيناقتاۋشى زەينەتاقى قورىنىڭ ۇلتتىق قورمەن بىرىگۋى تۋرالى يدەياعا تۇسىنىكتەمە بەردى
قور وكىلدەرىنىڭ ايتۋىنشا، ب ج ز ق ماماندارى بۇل مودەلدى تەرەڭ زەرتتەمەك.
«ماسەلە جيناقتالعان قارجىنى، زەينەتاقى اكتيۆتەرىن باسقارۋ مودەلى تۋرالى بولىپ وتىر. كەشە ۇلتتىق بانك تۇسىنىكتەمە بەردى. ولار بۇل يدەيانى جان- جاقتى زەردەلەۋ قاجەتتىگىن جەتكىزدى. نورۆەگيالىق زەينەتاقى جانە ساقتاندىرۋ جۇيەسىنىڭ وزىندىك ەرەكشەلىگى بار. وسى باعىتتاعى زەرتتەۋ جۇمىستارىنا تەك بانك وكىلدەرى عانا ەمەس قور ماماندارى دا جۇمىلدىرىلادى»، - دەدى ب ج ز ق ا ق باسقارما ءتوراعاسىنىڭ ورىنباسارى ساۋلە ەگەۋبايەۆا.
ايتا كەتەيىك، ەلباسى نۇرسۇلتان نازاربايەۆ قازاقستاندىق ب ا ق وكىلدەرىمەن كەزدەسكەن كەزىندە سەنىمدىلىكتى ارتتىرۋ ءۇشىن ۇلتتىق قور مەن ب ج ز ق بىرىگۋى ىقتيمال ەكەندىگىن ايتقان بولاتىن.
«سوندىقتان ارى قاراي زەينەتاقى قورىمەن نە ىستەۋگە بولادى؟ ماسەلەن نورۆەگيانىڭ جاقسى تاجىريبەسى بار - ولار زەينەتاقى جانە ۇلتتىق قورىن بىرىكتىردى. ءبىر قور پايدا بولدى، ادامدار، ءبارى ءۇشىن نىق ءارى سەنىمدى قورعا اينالدى. بىزدە وسى جولدى تاڭدارمىز. بۇل قارجىنى ۇكىمەت باقىلاۋىنسىز قالدىرۋعا بولمايدى. قالاي بولعاندا مەملەكەت زەينەتكەرلەر الدىندا زەينەتاقى ءۇشىن جاۋاپتى»، - دەدى قازاقستان پرەزيدەنتى.
اۆتور: گۇلميرا عوسمانالي
