دەپۋتاتتار جاڭا جىلدان كەيىن حالىقپەن كەزدەسەدى
بۇل جايىندا بۇگىن تومەنگى پالاتىنىڭ اعىمداعى جىلعى سوڭعى جالپى وتىرىسىن قورىتىندىلاعان ءماجىلىس ءتوراعاسى نۇرلان نىعماتۋلين ايتتى، دەپ حابارلايدى قازاقپارات.
«جاڭا 2018 جىل كەلە جاتىر. وزدەرىڭىز جاقسى بىلەسىزدەر، ءبىزدىڭ جاڭا جىلداعى جۇمىسىمىز ءارقاشاندا سايلاۋشىلارمەن كەزدەسۋدەن باستالادى. بۇل حالقىمىز ءۇشىن، ءبىز ءۇشىن دە وتە قاجەتتى، ماڭىزدى شارالار. سەبەبى ەلباسىمىز بىزگە ءارقاشاندا حالىقپەن تىكەلەي جۇمىس جاساپ، ەلىمىزدىڭ جاڭعىرتۋ ماقساتتارىن ءتۇسىندىرۋ تۋرالى ناقتى تاپسىرمالار بەردى. سوندىقتان ءاربىر اۋىلعا، ءاربىر قالاعا بارلىق باستامالاردى جانە ولاردىڭ زاڭ جاعىنان قولداۋ جۇمىستارىن جەتكىزۋ باستى مىندەتىمىز. سول ءۇشىن ءماجىلىس بيۋروسىنىڭ ارنايى شەشىمى قابىلدانىپ، دەپۋتاتتاردىڭ ايماقتارعا ساپارى جوسپارلانىپ وتىر»، - دەدى نۇرلان نىعماتۋللين.
ونىڭ ايتۋىنشا، بيۋرو شەشىمىنە سايكەس دەپۋتاتتار 2018-جىلدىڭ 3-12- قاڭتارى ارالىعىندا وڭىرلەردە بولىپ، سايلاۋشىلارمەن كەزدەسۋلەر وتكىزەدى. سونىمەن قاتار ءماجىلىس ءتوراعاسى پارلامەنتتىڭ وسى سەسسياسىندا اتقارىلعان جۇمىستارعا توقتالدى.
«پارلامەنتتىڭ وسى سەسسياسى باستالعاننان بەرى ءماجىلىس 80 زاڭ جوباسىن جۇمىسقا الىپ، ونىڭ 42 ءسى قارالىپ، ماقۇلداندى. تاعى 12 زاڭ جوباسىن ءماجىلىس دەپۋتاتتارىنىڭ وزدەرى ازىرلەدى. پارلامەنت قابىلداعان زاڭ جوبالارىنىڭ 27 سىنە بۇگىندە مەملەكەت باسشىسى قول قويىپ، زاڭدىق كۇشىنە ەندى»، - دەدى ءماجىلىس سپيكەرى.
