قازاقستاندا حالىق پەن بيلىكتى جاقىنداستىراتىن پورتال ىسكە قوسىلدى

پورتال ءاربىر ازاماتتىڭ جەرگىلىكتى اكىمدىككە ءوز جوبالارىن ۇسىنۋىنا، تالقىلاۋىنا، پىكىر بىلدىرۋىنە مۇمكىندىك بەرەدى، دەپ حابارلايدى قازاقپارات قوزعالىستىڭ باسپا ءسوز قىزمەتىنە سىلتەمە جاساپ.

جەرگىلىكتى تۇرعىنداردىڭ قالانى دامىتۋعا قاتىسۋىن قامتاماسىز ەتۋ ءۇشىن بۇل جوبا باتىس قازاقستان وبلىسىندا ىلكى جوبا رەتىندە قولعا الىندى. تۇرعىندار يدەيالارىن وبلىستىق اكىمدىك ۇسىنعان ينتەرنەت رەسۋرس ارقىلى جولداي الادى. مۇنداي جوبا وسى ۋاقىتقا دەيىن الەمنىڭ ءىرى قالالارىندا قولعا الىنىپ، ءوزىنىڭ تيىمدىلىگىن كورسەتتى.

جوبا نەگىزگى بەس قادامنان تۇرادى:

1. اكىمدىك بەلگىلى ءبىر ماسەلەنى دامىتۋ نەمەسە وزگەرتۋ تۋرالى تاقىرىپتى تۇرعىنداردىڭ نازارىنا ۇسىنادى؛

2. تاقىرىپ ينتەرنەت رەسۋرسقا ورنالاستىرىلادى. تۇرعىندار تالقىلايدى، پىكىر بىلدىرەدى؛

3. اكىمدىك كوپشىلىكتەن قولداۋ تاپقان جوبانى جاريالايدى؛

4. قولداۋ تاپقان جوبانى اكىمدىك قالاي جۇزەگە اسىرىپ جاتقانىن حابارلاپ وتىرادى؛

5. جوبانىڭ قالاي جۇزەگە اسىرىلعانىن جانە قورىتىندىلارى قالاي بولعانى تۋرالى ينفوگرافيكا تۇرىندەگى ەسەپ جاريالانادى.

«قازىرگى ۋاقىتتا كراۋدسورسينگ ءتاسىلى بيزنەس، الەۋمەتتىك نەمەسە قوعامدىق ماسەلەلەردى شەشۋ قۇرالى رەتىندە تانىلىپ كەلەدى. ساندىق تەحنولوگيانىڭ مۇمكىندىكتەرىن قولدانۋ ارقىلى پروبلەمالاردى وڭتايلاندىرۋعا ارنالعان جوبا ازاماتتاردىڭ تالاپ- تىلەكتەرىن قاناعاتتاندىرادى دەگەن ويدامىز. مۇنداي تاجىريبە رەسەي، فينليانديا ەلدەرىنىڭ بىرنەشە كومپانيالارىندا قولدانىلادى. الداعى ۋاقىتتا جەمىسىن بەرەتىنى داۋسىز»، - دەيدى جوبانىڭ جۇمىس توبى.