پرەزيدەنت جولدار تۋرالى: استانانى بارلىق وڭىرمەن بايلانىستىرۋدى كوزدەيمىز
«ءبىز، ەڭ الدىمەن، رەسپۋبليكالىق ماڭىزى بار جولداردى رەتكە كەلتىرۋدى، ءترانزيتتى قامتاماسىز ەتۋدى نەگىزگى تاپسىرما ەتىپ الدىق. بۇگىنگى تاڭدا وسى جۇمىسپەن اينالىسىپ جاتىرمىز. رەسپۋبليكالىق ماڭىزى بار جولداردىڭ 85 پايىزى جاقسى نەمەسە قاناعاتتانارلىق جاعدايدا. وبلىس ىشىندەگى جولدار دا بار. ول جولداردىڭ تەك 60 پايىزى قاناعاتتانارلىق جاعدايدا. ءبىز ەڭ الدىمەن استانانى بارلىق وڭىرمەن بايلانىستىرۋدى كوزدەپ وتىرمىز»، - دەيدى مەملەكەت باسشىسى.
نۇرسۇلتان نازاربايەۆ ءوز سوزىندە استانانى بارلىق وڭىرلەرمەن بايلانىستىرۋ ارقىلى ەكونوميكانى وركەندەتۋگە بولاتىنىن تىلگە تيەك ەتتى.
«ول قادام ەكونوميكانىڭ ۇلكەن ارتىقشىلىعىنا اينالادى. بۇل - ساۋدا، باسەكەگە قابىلەتتىلىك، قوزعالىس، جىلدامدىق. ادامداردىڭ بايلانىسى نىعايىپ، ەڭبەك، اقشا، كاپيتال قوزعالىسقا تۇسەدى. قازىر وبلىس ىشىندەگى جانە اۋداندار اراسىنداعى جولداردى رەتكە كەلتىرۋمەن اينالىسۋ كەرەكتىگىن ايتىپ وتىرمىن. مۇمكىن، قاجەتتىلىگى اسا باسىم ەمەس رەسپۋبليكالىق ماڭىزى بار جولداردى قويا تۇرىپ، اقشانى سوندا جىبەرگەن ابزال بولار. وبلىستاردىڭ وزدەرى دە ءوز ىشىندەگى اۋدانارالىق جولداردى رەتكە كەلتىرۋى ءتيىس. ءبىز بۇنىمەن اينالىسامىز»، - دەپ شەگەلەي ءتۇستى پرەزيدەنت.
مەملەكەت باسشىسى ءسوز سوڭىن ويلى ازىلمەن اياقتادى.
«كوردىڭىزدەر مە؟ ول جولدار سالىنباعاندا «نەگە سالىنبايدى» دەپ ايتىلدى. سالدىق - ءبارىبىر «جامان» دەگەننەن قۇتىلعان جوقپىز (كۇلدى). سۇراق دۇرىس قويىلىپ وتىر، ءبىراق ماسەلەلەردىڭ بارلىعى قادام-قادام سايىن شەشىلەدى»، - دەپ ءتۇيدى ەلباسى.
ەسكە سالا كەتسەك، 22- جەلتوقسان كۇنى ەلباسى نۇرسۇلتان نازاربايەۆ ەلىمىزدەگى جەتەكشى باق وكىلدەرىنە 2017-جىلدى قورىتىندىلاۋعا ارنالعان سۇحبات بەردى. وندا پرەزيدەنت قازاق قوعامىنداعى ەلەۋلى وزگەرىستەر مەن وزەكتى ماسەلەلەر تۋرالى جۋرناليستەر سۇراعىنا جاۋاپ بەردى. اتالمىش سۇحباتتىڭ تەلەۆيزيالىق نۇسقاسى بۇگىن رەسپۋبليكاىق تەلەارنالاردىڭ ەفيرىنەن كورسەتىلدى.
