نۇرسۇلتان نازاربايەۆ ابايدىڭ وزبەكتەرگە قاتىستى ءسوزىن ەسكە الدى

استانا. قازاقپارات - وتاندىق باق وكىلدەرىنە سۇحبات بەرگەن ق ر پرەزيدەنتى نۇرسۇلتان نازاربايەۆ وزبەكستانمەن اراداعى قارىم-قاتىناسقا توقتالدى، دەپ حابارلايدى قازاقپارات ءتىلشىسى.

«وزبەكتەر - بىزگە وتە جاقىن اعايىن. اباي بابامىز ىلعي مال سوڭىندا جۇرە بەرمەي، وزبەكتەن جەرمەن جۇمىس ىستەۋدى ۇيرەنىڭدەر دەپ كەتكەن بىزگە. ولار - ۇلكەن كورشىمىز. ورتالىق ازياداعى ەڭ ۇلكەن مەملەكەت، حالىق جاعىنان، ەكونوميكا جاعىنان. سوندىقتان قازاقستان ءۇشىن ول ەلمەن بايلانىس وتە ءتيىمدى، پايدالى، قاجەت»، - دەدى مەملەكەت باسشىسى.

پرەزيدەنتتىڭ ايتۋىنشا، قازاقستان مەن وزبەكستان ەكىجاقتى ساۋدا اينالىمىن 5 ميلليارد دوللارعا جەتكىزۋدى كوزدەيدى. «وزدەرىڭىز جاقسى بىلەسىزدەر، قوستانايدا بىرلەسىپ اۆتوموبيل شىعارىپ جاتىرمىز. تاشكەنتكە پوەزد جۇرەتىن بولدى. ۇشاقتار ۇشاتىن بولدى. بۇرىن اناۋ جەردەن، مىناۋ جەردەن اينالىپ جۇردىك قوي. ونىڭ بارلىعى اشىلدى. سوندىقتان ەكى اراداعى ساۋدا- ساتتىق ۇلعايىپ كەلەدى»، - دەپ اتاپ كورسەتتى ن. نازاربايەۆ.

ايتا كەتەيىك، ءوز سۇحباتىندا مەملەكەت باسشىسى بيۋجەت اقشاسى بانكتەرگە نە ءۇشىن بەرىلىپ جاتقانىن دا ءتۇسىندىردى. ءوز سوزىندە مەملەكەت باسشىسى بتا بانكىن ەسكە الدى. بۇدان بولەك، نۇرسۇلتان نازاربايەۆ قالتالى ازاماتتاردى ورالماندارعا كومەك بەرۋگە ۇندەدى. پرەزيدەنتتىڭ ويىنشا، ۇلكەن قالالاردا ەلەكتروموبيلدەردى كوپتەپ جۇرگىزۋ كەرەك. سۇحبات كەزىندە مەملەكەت باسشىسى «استانا» قارجى ورتالىعىنىڭ پايداسىن قاراپايىم تىلدە ءتۇسىندىردى.