استاناعا گاز تارتۋعا قارجى بار - مەملەكەت باسشىسى

استانا. قازاقپارات - وتاندىق ب ا ق وكىلدەرىنە سۇحبات بەرگەن قازاقستان پرەزيدەنتى نۇرسۇلتان نازاربايەۆ استاناعا گاز قۇبىرىن سالۋعا قاجەت قارجى بار ەكەنىن ءمالىم ەتتى، دەپ حابارلايدى قازاقپارات.

«قالاعا گاز تارتۋ كۇن تارتىبىندە تۇر. ءبىز -مۇناي مەن گاز وندىرەتىن ەلمىز. ياعني مۇناي مەن گاز ەلدىڭ ءبىر بولىگىندە بولسا، ەلوردا باسقا بولىگىندە ورنالاسقان. قازىرگى كەزدە ءبىز وسىندا گاز جەتكىزۋ ماسەلەسىن قاراستىرىپ جاتىرمىز. قىزىلوردا وڭىرىنەن گازدى تارتىپ، ونى جەزقازعانعا، قاراعاندىعا، تەمىرتاۋعا، سونداي-اق ارى قاراي استاناعا، پاۆلودارعا، پەتروپاۆلعا جەتكىزۋ جوسپارى بار. ونى جۇزەگە اسىراتىن بولامىز. ول ءۇشىن قارجى دا بار. الايدا بۇل جۇمىستاردى ىسكە اسىرۋعا قانداي دا ءبىر مەرزىم كەرەك ەكەنى انىق»، - دەدى نۇرسۇلتان نازاربايەۆ.

وسى ورايدا پرەزيدەنت بۇل جوبانىڭ ىسكە قوسىلۋىن كۇتپەي- اق، استاناعا سۇيىتىلعان گازدى جەتكىزۋگە ۋاعدالاستىق جاسالعانىن اتاپ ءوتتى.

«قازىر وسىنى كۇتپەستەن ءبىز سۇيىتىلعان گازدى استاناعا جەتكىزۋگە كەلىستىك. ول تۇرمىستىق وتىن رەتىندە جاعىلادى. ءبىراق تا بىرتىندەپ قالانى ەلەكترلى كولىكپەن جابدىقتاپ، قوعامدىق كولىكتى گازبەن جۇرۋگە كوشىرۋ قاجەت»، - دەدى ەلباسى.

ايتا كەتەيىك، 22- جەلتوقسان كۇنى ەلباسى نۇرسۇلتان نازاربايەۆ ەلىمىزدەگى جەتەكشى ب ا ق وكىلدەرىنە 2017-جىلدى قورىتىندىلاۋعا ارنالعان سۇحبات بەردى. وندا پرەزيدەنت قازاق قوعامىنداعى ەلەۋلى وزگەرىستەر مەن وزەكتى ماسەلەلەر تۋرالى جۋرناليستەر سۇراعىنا جاۋاپ بەردى. اتالمىش سۇحباتتىڭ تەليەۆيزيالىق نۇسقاسى بۇگىن رەسپۋبليكالىق تەلەارنالاردىڭ ەفيرىنەن كورسەتىلدى.