ق ر پرەزيدەنتى «استانا» قارجى ورتالىعىنىڭ پايداسىن قاراپايىم تىلدە ءتۇسىندىردى

استانا. قازاقپارات - وتاندىق ب ا ق وكىلدەرىنە سۇحبات بەرگەن ق ر پرەزيدەنتى نۇرسۇلتان نازاربايەۆ «استانا» حالىقارالىق قارجى ورتالىعىنىڭ حالىققا بەرەتىن پايداسىن قاراپايىم تىلدە ءتۇسىندىرىپ بەردى.

اتالعان ورتالىق كەلەسى جىلدان باستاپ ەكسپو ايماعىندا جۇمىس ىستەي باستايدى، دەپ حابارلايدى قازاقپارات ءتىلشىسى.

«ونداي قارجى ورتالىعى ورتالىق ازيادا العاش رەت اشىلىپ وتىر. ونداي ورتالىق رەسەيدە دە جوق. قازىر الەمگە تانىمال بانكتەر ورتالىقپەن بىرلەسىپ جۇمىس ىستەۋگە كەلىستى. ولاردىڭ ىشىندە دۇنيەجۇزىلىك بانك، ەۋروپالىق بانك، ازيالىق بانك، يسلام بانكى جانە تاعى باسقالار بار. بارلىعى ءوز كەڭسەلەرىن اشىپ، اقشا اكەلەدى. قۇرىلىسقا اقشا سالادى. كورشى ەلدەرگە دە قارجى قۇياتىن شىعار. حالىق بولسا، اقشانى اكسيالارعا سالىپ، ديۆيدەند الۋدى ۇيرەنەدى»، - دەدى مەملەكەت باسشىسى.

پرەزيدەنتتىڭ ايتۋىنشا، «استانا» حالىقارالىق قارجى ورتالىعى لوندون، شاڭحاي، گونكونگ پەن دۋباي بيرجالارى ۇلگىسىندە قۇرىلىپ وتىر. ول جەردە بارلىق ينۆەستيتسيالىق داۋلار اعىلشىن سوتى نەگىزىندە قورعالادى. «مەن سۋديانى دا بەكىتىپ قويدىم. ول لوندوندا باس سۋديا قىزمەتىن اتقارعان. قالعان 9 سۋديا دا سونداي. سەبەبى اقشا اكەلەتىن ادامدار دا، كومپانيالار دا ءوز كاپيتالىنىڭ قاۋىپسىزدىگىنە سەنىمدى بولۋى قاجەت. سوتقا سەنىم بولۋى شارت. الەمدىك اربيتراجعا بارماي، ءبارىن وسى جەردە شەشۋ كەرەك»، - دەپ اتاپ كورسەتتى ن. نازاربايەۆ.

ايتا كەتەيىك، ءوز سۇحباتىندا مەملەكەت باسشىسى بيۋدجەت اقشاسى بانكتەرگە نە ءۇشىن بەرىلىپ جاتقانىن دا ءتۇسىندىردى. ءوز سوزىندە مەملەكەت باسشىسى بتا بانكىن ەسكە الدى. بۇدان بولەك، «ەكسپوعا جۇمسالعان اقشا اقتالا ما؟» دەگەن سۇراققا جاۋاپ بەردى. نۇرسۇلتان نازاربايەۆ قالتالى ازاماتتاردى ورالماندارعا كومەك بەرۋگە ۇندەدى.