ق ر پرەزيدەنتى لاتىن ءالىپبيى جايلى: ناعىز تاۋەلسىزدىك - ول ءتىلدىڭ دە تاۋەلسىزدىگى

استانا. قازاقپارات - لاتىن قارپىندەگى قازاق الىپبيىنە قاتىستى ماسەلەدە ناقتى ىسكە كىرىسۋ قاجەت. وتاندىق ب ا ق وكىلدەرىمەن كەزدەسۋ بارىسىندا قازاقستان پرەزيدەنتى نۇرسۇلتان نازاربايەۆ وسىلاي دەپ پىكىر ءبىلدىردى، دەپ حابارلايدى «قازاقپارات» ح ا ا ءتىلشىسى.

ەلباسى ءوز سوزىندە لاتىن گرافيكاسىنداعى ءالىپبيدىڭ ماڭىزدىلىعىنا توقتالا كەتتى.

«تاۋەلسىزدىك العان كۇندەردىڭ باسىنان باستاپ ايتىپ كەلە جاتىرمىز وسى ماسەلەنى. ناعىز تاۋەلسىزدىك - ول ءتىلدىڭ دە تاۋەلسىزدىگى. مۇنىڭ بەرى جاعىندا بۇكىل دۇنيەنىڭ 70 پروتسەنتى سول الىپبيمەن جۇمىس ىستەيدى. بىرىنشىدەن - بۇل عىلىمنىڭ، تەحنولوگيانىڭ، ينتەرنەتتىڭ ءالىپبيى. بۇل ءالىپبي قازاقتىڭ تىلىنە قانشالىقتى پايدا اكەلەتىنىن جازۋشىلار، جۋرناليستەر جاقسى بىلەدى. كيريلليتسانىڭ ىشىندە بىزدە قولدانىلمايتىن ارىپتەر بار. ول جاعىن دا ويلاۋىمىز كەرەك. ۇشىنشىدەن ءبىز وركەنيەتتى ەلدەردىڭ اراسىندا قوسىلىپ، 30 دامىعان ەلدىڭ قاتارىنان كورىنەمىز دەسەك، سولارمەن بىرگە بولۋىمىز كەرەك قوي. سونداي-اق، قازاق ءتىلىن باسقا حالىقتاردىڭ ۇيرەنۋى ءۇشىن دە بۇل ءالىپبيدىڭ پايداسى بار»، - دەدى نۇرسۇلتان نازاربايەۆ.

مەملەكەت باسشىسى قازىرگى تاڭدا بۇرىنعى جاريالانعان كىتاپتاردى ينتەرنەت ارقىلى جاڭا الىپبيگە اۋدارۋ قيىنشىلىققا تۇسپەيتىنىن ەسكەرتىپ ءوتتى.

«بۇل ماسەلەدە «نەگە، قالاي؟» دەگەن سۇراقتاردى قويىپ، ناقتى ىسكە كىرىسۋ كەرەك. حالىقتىڭ كوپشىلىگى، 95 پايىزدان كوبى وسىنى قولدادى. اسىرەسە، ءوز حالقىمىز. كيريلل ءقارپى دە قالاي جۇمىس ىستەدى، سولاي جۇمىس اتقارا بەرەدى. بىزدە ءبىرىنشى سىنىپتان باستاپ بالالار ءۇش تىلدە وقيدى. قازاق، ورىس جانە اعىلشىن تىلدەرىندە. 2025-جىلعا قاراي مەكتەپ بىتىرۋشىلەردىڭ بارلىعى جۇمىس اتقارا الاتىنداي دەڭگەيدە ءۇش ءتىلدى مەڭگەرەتىن بولادى. وندا ەشقانداي ماسەلە تۋىندامايدى. بارلىق مەكتەپتەردە ءبىرىنشى سىنىپتان باستاپ اعىلشىن ءتىلى وقىتىلادى. قانداي الىپبيمەن وقىتىلادى؟ لاتىن الىپبيىندە. سوندىقتان، بالالار ونى تەز مەڭگەرەدى»، - دەيدى پرەزيدەنت.

مەملەكەت باسشىسى سونىمەن بىرگە، لاتىن الىپبيىنە كوشكەن تۇركى تىلدەس اعايىنداردىڭ جەتىستىگىن اتاپ ءوتتى.

«مەن «ەگەمەن قازاقستان» گازەتىنە، قازاق ءتىلدى باسىلىمداردىڭ ءبىر بۇرىشىندا سول تىلمەن جازا بەرۋدى ۇسىنامىن. ەل وقي بەرسىن. ءوزىم كابينەتىمدە وتىرىپ، ابايدىڭ سوزدەرىن لاتىن الىپبيىمەن جازامىن. باستاپقىدا وڭاي بولمايدى. كوشەنىڭ اتتارىن، اۋىلدىڭ اتتتارىن ەپتەپ سول الىپبيگە كوشىرەمىز. گازەتتەردىڭ ءبىر بۇرىشتارىندا سول الىپبيمەن جازىلار بولسا، ەلدىڭ سول ارقىلى ءتىلى جاتتىعادى»، - دەيدى ق ر پرەزيدەنتى.

ەلباسى كەزدەسۋ بارىسىندا «بولاشاققا باعدار: رۋحاني جاڭعىرۋ» باعدارلامالىق ماقالاسى جونىندە پىكىر بىلدىرگەن بولاتىن.