قازاقستاننىڭ اقىلى جولدارى قانشا قارجى تابادى
ونىڭ سوزىنە قاراعاندا، اعىمداعى جىلى استانا-تەمىرتاۋ، الماتى-قاپشاعاي جانە الماتى-قورعاس ۋچاسكەلەرىندە اقىلى جول جۇيەسىن قۇرۋ جۇمىستارى باستالعان. ونىڭ جوسپارلانعان جىلدىق ءتۇسىمى 4 ميلليارد تەڭگەنى قۇرايتىن بولادى.
«2020-جىلعا قاراي اقىلى جولدان تۇسەتىن جينتىق ءتۇسىم 30 ميلليارد تەڭگەگە جەتەدى»، - دەدى مەرەكە پىشەمبايەۆ.
كوميتەت باسشىسىنىڭ دەرەگىنشە، بيىل قاراعاندىنى اينالىپ وتەتىن جولدى قوسقاندا ورتالىق-وڭتۇستىك جوباسىنىڭ تەمىرتاۋ-قاراعاندى ۋچاسكەسىندە قۇرىلىس جالعاسۋدا. سونىمەن قاتار ورتالىق-شىعىس جوباسى بويىنشا استانا-پاۆلودار-سەمەي-قالباتاۋ جانە بەينەۋ-اقتاۋ، اقتوبە-اتىراۋ، قاپشاعاي-تالدىقورعان، استانا-پەتروپاۆل، ورال-كامەنكا ۋچاسكەلەرىندەگى جالپى ۇزىندىعى 1,2 مىڭ شاقىرىم بولاتىن ۋچاسكەدە جۇمىستار جۇرگىزىلۋدە.
بۇعان قوسا، بيۋدجەت قاراجاتى ەسەبىنەن ۇزىندىعى 511 شاقىرىم بولاتىن بەينەۋ-اقجىگىت، شۋچە-زەرەندى، تاسكەسكەن-باقتى، ءۇشارال-دوستىق، قوستاناي-دەنيسوۆكا سياقتى 6 جوبانى ىسكە اسىرۋ قولعا الىنعان.
«2018-2019-جىلدارى رەسپۋبليكالىق ماڭىزى بار 6,2 شاقىرىم اۆتوجولداردى ورتاشا جوندەۋدەن وتكىزۋ ءۇشىن 4,4 مىڭ شاقىرىمدى قايتا جاڭعىرتۋ جانە 800 شاقىرىم جولعا كۇردەلى جوندەۋ جۇمىستارىن جۇرگىزۋ جوسپارلانىپ وتىر»، - دەدى ول.
ونىڭ ايتۋىنشا، 2018-جىلى ورتالىق-شىعىس ءدالىزىنىڭ استانا-پاۆلودار، تەمىرتاۋ-قاراعاندى ۋچاسكەلەرىن، ساراتوۆقا شىعاتىن ورال-كامەنكا اۆتوجولىن جانە تاسكەسكەن-باقتى ۋچاسكەسىن اياقتاۋ جوسپارلانعان.
