ا ق ش رەسەيلىك قىلمىس الەمى وكىلدەرىن «قارا تىزىمگە» قوستى

مينيسترلىك سايتىندا جاريالانعان اقپاراتتا بۇرىنعى س س س ر ەلدەرىندەگى قىلمىس الەمىنە قاتىسى بار كەي ادامداردىڭ اتى-ءجونى اتالعان.

«قارا تىزىمگە» ەنگىزىلگەندەر اراسىندا رەسەيلىك كەيبىر ب ا ق قىلمىس الەمىنىڭ ءىرى وكىلدەرى («ۆور ۆ زاكونە») دەپ سيپاتتايتىن اليمجان توحتاحۋنوۆ (لاقاپ ەسىمى - «تايۆانچيك»)، زاحاري كالاشوۆ («شاكرو مولودوي»)، رۋبەن تاتۋليان («روبسون»)، ۆلاديمير تيۋرين («تيۋريا»)، قىرعىزستاندىق قامشىبەك كولبايەۆ («كوليا-قىرعىز»)، وزبەكستان ازاماتى گافۋر راحيموۆ («اقباس گافۋر») جانە وزگەلەر بار. ولارعا امەريكالىق ازاماتتارمەن بيزنەس جۇرگىزۋگە جانە ا ق ش اۋماعىنا كەلۋىنە تىيىم سالىنادى.

تىزىمدەگىلەردىڭ ىشىنەن ۆلاديمير تيۋريندى بۇعان دەيىن ۋكراينا باس پروكۋراتۋراسى بيىل ناۋرىزدا كيەۆتە قاستاندىقپەن ولتىرىلگەن رەسەي مەملەكەتتىك دۋماسىنىڭ بۇرىنعى دەپۋتاتى دەنيس ۆورونەنكوۆتىڭ قازاسىن ۇيىمداستىرۋشى رەتىندە اتاعان. تيۋرين ول ايىپتاۋدى جوققا شىعارعان.

سونىمەن بىرگە رۋبەن تاتۋلياننىڭ يەلىگىندەگى ەكى رەسەيلىك كومپانياعا قارسى سانكسيا ەنگىزىلگەن.

ا ق ش بيلىگى بۇل سانكسيالاردى بۇرىنعى س س س ر ەلدەرىنەن شىققان «كانىگى باۋكەسپەلەرگە» («ۆورى ۆ زاكونە») قارسى كۇرەس اياسىندا قابىلداعان. اتالعان قىلمىستىق توپ رەسەي، ا ق ش، گرەكيا، يسپانيا جانە ۋكراينا اۋماعىندا ارەكەت ەتەدى.

بۇدان ءبىر كۇن بۇرىن ا ق ش قارجى مينيسترلىگى «ماگنيتسكي زاڭى» اياسىندا 13 ادام جانە 39 ۇيىمعا قارسى سانكتسيالار جاريالاعان. «قارا تىزىمگە» الىنعاندار اراسىندا رەسەي باس پروكۋرورى يۋري چايكانىڭ ۇلى ارتەم، وزبەكستاننىڭ بۇرىنعى پرەزيدەنتىنىڭ ۇلكەن قىزى گۇلنارا كاريموۆا، كيەۆتەگى «بەركۋت» ارنايى جاساق پولكىنىڭ بۇرىنعى باسشىسى سەرگەي كۋسيۋك تە بار.