بۋرابايدا «قىسقى ەرتەگى» فەستيۆالى باستالدى

ەكى اي بويى قىسقى دەمالىستى كوڭىلدى وتكىزۋ جانە جاڭا جىل مەرەكەسىن تويلاۋعا ارنالعان ءتۇرلى شوۋ-باعدارلامالار، ويىن-ساۋىق، سپورت، ت. ب. شارالار وتكىزىلەدى.

جوبانىڭ باستى ماقساتى دەمالىس ورىندارىنا تۋريستەردى مۇمكىندىگىنشە كوبىرەك تارتۋدى، اقمولا وبلىسىنىڭ تۋريستىك الەۋەتىن كوتەرۋدى كوزدەيدى.

«فەستيۆال اياسىندا اقمولا وبلىسىنىڭ دەمالىس ورىندارى اراسىندا ۇزدىك «قىسقى ەرتەگى» جاڭاجىلدىق باعدارلاماسى بويىنشا بايقاۋ وتەدى. ەكى ايلىق شارانى كەڭىنەن ناسيحاتتاۋ ءۇشىن رەسپۋبليكالىق جانە وبلىستىق دەڭگەيدە «اكەم، اپام، مەن - سپورتتىق وتباسىمىز» تەلەشوۋى ۇيىمداستىرىلادى»، - دەيدى اقمولا وبلىستىق تۋريزم باسقارماسىنداعىلار.

دەمالىس ورىندارىنىڭ جابدىقتالۋى مەن قىسقى سپورت جارىستارىن وتكىزۋ دەڭگەيىن ارنايى كوميسسيا باعالاپ وتىرادى. بايقاۋ سوڭىندا «ۇزدىك مۇز ەرتەگى قالاشىعى»، «ۇزدىك جاڭاجىلدىق باعدارلاما» جانە «قىسقى دەمالىستى ۇيىمداستىرۋ ۇزدىگى» اتالىمدارى بويىنشا ءۇش جەڭىمپاز انىقتالادى، سونداي-اق بەلسەندى قاتىسقان دەمالىس ورىندارىنا دا ىنتالاندىرۋ سىيلىقتارى بەرىلەدى.