ماعجان جۇمابايەۆتىڭ كوزى تىرىسىندە جارىق كورگەن كىتابى كورمەگە قويىلدى - فوتو

پەتروپاۆل. قازاقپارات - سولتۇستىك قازاقستانداعى ارنايى جارمەڭكەدە «رۋحاني جاڭعىرۋ» باعدارلاماسىنىڭ قالاي جۇزەگە اسىرىلىپ جاتقانى كورسەتىلدى، دەپ حابارلايدى «قازاقپارات» ح ا ا ءتىلشىسى.

كورمەگە وبلىستاعى بارلىق اۋداننان ەكسپوناتتار قويىلدى. ولاردىڭ اراسىندا تاريحي قۇجاتتار، حالىق شىعارماشىلىعى بۇيىمدارى، كيەلى مەكەندەردىڭ ماكەتتەرى، ت. ب. بولدى. سونداي-اق كورمە اياسىندا قۇمىرا جاساۋ جانە ساز يلەۋ ونەرى بويىنشا شەبەرلىك ساباقتارى وتكىزىلدى.

 

«ءاربىر اۋدان قاي باعىتتا جۇمىس ىستەپ جاتقانىن كورسەتەدى. «رۋحاني جاڭعىرۋ» باعدارلاماسى تاريحي قۇندىلىقتار مەن ۇلتتىق كودتى ساقتاپ قالۋعا باعىتتالعان. ءار اۋدان دەربەس جوبا ازىرلەپ، اۋقىمدى جۇمىستار اتقاردى. كورمەدە ول كورسەتىلدى دە. مۇندا بالالاردىڭ ونەر تۋىندىلارى دا، قولدانبالى ونەر ۇلگىلەرى دە، تاريحي قۇجاتتار دا بار»، - دەيدى «ابىلايحاننىڭ رەزيدەنتسياسى» مۋزەي كەشەنى ديرەكتورىنىڭ ورىنباسارى اسەمگۇل قىدبەكوۆا.

 

م. جۇمابايەۆ اۋدانى «رۋحاني جاڭعىرۋ» جوبالىق كەڭسەسىنىڭ باسشىسى سەرىك جۇماعۇلوۆ جەرگىلىكتى مۋزەيدە ماعجان جۇمابايەۆتىڭ كوزى تىرىسىندە جارىق كورگەن كىتابى دا بار ەكەنىن ايتتى.

«بۇل ءبىزدىڭ اۋدانداعى اقىننىڭ جالعىز كىتابى. ول توڭكەرىسكە دەيىن اراب جازۋىمەن باسىپ شىعارىلعان. ماعجان جۇمابايەۆتىڭ 1924 -جىلى شىققان «پەداگوگيكا» كىتابىنىڭ ديزاينەرلىك كوشىرمەسى بار. ونىڭ ءتۇپنۇسقاسى تۇركىستاندا ساقتاۋلى. تاعى ءبىر تاماشا ەكسپوناتىمىز بار، ول - اقىن ماعجاننىڭ لاتىن گرافيكاسىمەن جازىلىپ، تۇركيادا باسپا بەتىن كورگەن كىتابى»، - دەيدى سەرىك جۇماعۇلوۆ.

 

اۋداندىق مۋزەيدەن اۋىل ادامدارىنىڭ لاتىن گرافيكاسىمەن جازىلعان قۇجاتتارى دا تابىلعان. ولار دا كورمەگە قويىلدى.

ەسكە سالا كەتسەك، تامىز ايىندا وبلىستىق كورمەدە ماعجان جۇمابايەۆتىڭ بۇرىن قۇپيا بولعان قولجازبالارى دا جۇرتشىلىققا ۇسىنىلعان بولاتىن.