ب ۇ ۇ رەسەيدى ايىپتاعان قاراردى ماقۇلدادى
استانا. قازاقپارات - ب ۇ ۇ باس اسسامبلەياسى رەسەي اننەكسيالاپ العان قىرىمدا ادام قۇقىقتارىنىڭ بۇزىلعانىن قاتاڭ ايىپتاپ، رەسەيدى تۇبەكتەگى «وككۋپاتسيا جاسايتىن كۇش» دەپ باعالايتىن قاراردى ماقۇلدادى.
ۋكراينا مەن باسقا 30 ەل ۇسىنعان قاراردى 70 مەملەكەت قولدادى. 26 مەملەكەت، ونىڭ ىشىندە رەسەي، بەلارۋس، قازاقستان جانە قىتاي قارارعا قارسى داۋىس بەردى. 36 مەملەكەت قالىس قالدى.
ۋكراينانىڭ ب ۇ ۇ- داعى تۇراقتى وكىلدىگى قارار ۋكراينا مەن رەسەي اراسىندا قارۋلى قاقتىعىس بولعانىن راستايتىنىن جانە ماسكەۋ 2014 -جىلى اننەكسيالاپ العان تەرريتوريادا رەسەي زاڭدارىنىڭ شەكتەن تىس قولدانىلعانىن ايىپتايتىنىن ايتتى. ۋكراينانىڭ سىرتقى ىستەر ءمينيسترى پاۆەل كليمكين قارار ب ۇ ۇ قابىلداعان «ەڭ قاتاڭ» قارارلارىنىڭ ءبىرى ەكەنىن مالىمدەدى.
«رەسەيگە قىسىم كۇشەيىپ بارادى» دەپ جازدى كليمكين. باس اسسامبلەيا قىرىمداعى ادام قۇقىقتارىنىڭ بۇزىلعانىن ايىپتايتىن العاشقى قارارىن بىلتىر قابىلداعان.
ب ۇ ۇ- داعى ۋكراين ديپلوماتتارى رەسەي ب ۇ ۇ- عا مۇشە مەملەكەتتەرگە قارارعا قارسى داۋىس بەرۋ نەمەسە قالىس قالۋ ءۇشىن «ۇلكەن قىسىم جاساعانىن» ايتتى. رەسەي قىرىمدىقتار 2014 -جىلى ناۋرىزدا وتكەن رەفەرەندۋمدا رەسەيگە قوسىلۋعا داۋىس بەردى دەپ بىلەدى. ءبىراق حالىقارالىق قاۋىمداستىق ول رەفەرەندۋمدى زاڭسىز وتكىزىلدى دەپ مويىنداماعان.
ۋكراينانىڭ ب ۇ ۇ- داعى وكىلدىگى قارار رەسەي باسىپ العان تەرريتورياداعى ۋكراينا ازاماتتارىن كۇشتەپ قولاستىنا الىپ جاتقانىن ايىپتاپ، زاڭسىز تۇتقىندا وتىرعان ۋكرايندىقتاردى بوساتۋعا شاقىراتىنىن ايتادى. قارار قىرىمداعى ادام قۇقىعىن بۇزۋدىڭ بارلىق ءتۇرىن، ونىڭ ىشىندە «ءجونسىز ۇستاپ، ازاپتاۋدى جانە باسقا دا ادامشىلىققا جات ارەكەتتەردى» دەرەۋ توقتاتۋعا ۇندەيدى.
www.azattyq.org
