قۇلىن اتاۋلارى تۋرالى بىلە جۇرەيىك

استانا. قازاقپارات - قازاق حالقىنىڭ تاريحى جىلقىمەن اتام زاماننان بەرى ەتەنە ەكەنى انىق. سوندىقتان ۇلتىمىزدىڭ سان عاسىرلىق تاريحىندا قامبار اتا تۇلىگىنىڭ الار ورنى ەرەكشە.

ياعني جىلقىمەن قازاق ءومىرى بىتە قايناسقان. دەمەك بۇل جانۋاردىڭ بولمىس-ءبىتىمى، جاراتىلىسى الاش بالاسىنا ابدەن تانىس، بەسەندەن بەلگىلى ءسوز. سولاي بولسادا، وسى ءبىر ىشسەڭ سۋسىن، جەسەڭ تاماق، مىنسەڭ كولىك بولاتىن سايگۇلىكتەردىڭ ورنىن بۇگىندە تەحنيكا باسىپ، ول تۋرالى تانىم-تۇسىنىگىمىز كۇن ساناپ كەمىپ بارادى. ءبىز بۇگىن وقىرمانعا جىلقىنىڭ ءبىر جاسقا دەيىنگى تۇلىگى قۇلىن اتاۋلارى تۋرالى ۇسىنىپ وتىرمىز.   

قۇلىن اتاۋلارى:

قۇلىن (ءتول) - بيەلەردىڭ كوكتەمدە تۋعان جاس ءتولى.

قۇلىنشاق -  قۇلىندى ەركەلەتىپ اتاعان ءتۇرى.

كۇن قاقتى قۇلىن - ەنەسى ءمىنىلىپ ءجۇرىپ، ءجوندى ەمبەي، سۇتتەن قاقتىعىپ قالعان قۇلىن.

بۇدان قۇلىن - ءار تۇقىمنان تۋعان قۇلىن

دوبىر اياق قۇلىن - قىس ايلارىندا تۋعان قۇلىن

مايەكتى قۇلىن- ەنەسىنىڭ سۇتىنە تويعان، توق پەيىل قۇلىن.

كەنجە قۇلىن - ماي ايىنىڭ اياعىندا تۋعان قۇلىن.

قارا قۇلاق قۇلىن - جاز قۇلىننىڭ شيراپ، بايلانۋعا كەلگەنى.

جەتىم قۇلىن - ەنەسى ءولىپ جەتىم قالعان قۇلىن.

جاباعى -  قۇلىننىڭ 6-7 ايعا تولعانى.

 

 ازىرلەگەن بەيسەن سۇلتان ۇلى