استانادا سالماعى بەس جارىم كەلى قىز دۇنيەگە كەلدى

دارىگەرلەردىڭ ايتۋىنشا، ول استانادا سوڭعى 20 جىلدا وسىنداي اۋىر سالماقتا تۋعان ءۇشىنشى قىز بالا، دەپ حابارلايدى ەلوردا اكىمدىگىنىڭ مەديا ورتالىعى.

«نارەستە 13 -جەلتوقساندا دۇنيەگە كەلدى، ونىڭ تۋعانداعى سالماعى 5400 گرام بولدى. بوسانۋ ەش قيىندىقسىز وتكەن. بوسانعاننان كەيىنگى كەزەڭ دە قالىپتى بولدى. ءسابي مەن ونىڭ اناسىنىڭ جاعدايى قالىپتى كۇيىندە ۇيىنە شىعارىلدى»، - دەدى مەديا ورتالىقتىڭ تىلشىسىنە بەرگەن سۇحباتىندا № 3-پەريناتالدىق ورتالىقتىڭ بوسانۋ ءبولىمىنىڭ مەڭگەرۋشىسى ەلميرا ءالىمجان.

اتا-اناسى ەكى ۇلدان سوڭ تۋعان الىپ قىزدىڭ ەسىمىن جاننۇر دەپ قويىپتى.

استانا قالاسىنىڭ دەنساۋلىق ساقتاۋ باسقارماسى اتاپ وتكەندەي، باس قالادا سالماعى 5584 گرام بولعان العاشقى الىپ قىز 2003 -جىلى №2 -پەريناتالدىق ورتالىقتا تۋعان. ال 2014 -جىلى دۇنيەگە كەلگەن ەكىنشى الىپ قىزدىڭ سالماعى 5750 گرام بولدى. سونداي-اق، وسى جىلى ەلورداداعى ەڭ اۋىر سالماقتاعى ۇل بالا دۇنيەگە كەلدى. ونىڭ تۋعانداعى سالماعى 5,5 ك گ كورسەتتى.