بەردىبەك ساپاربايەۆ اۋىل تۇرعىندارىن كاسىپپەن اينالىسۋعا شاقىردى

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ مەملەكەتتىك باعدارلامالاردى ءتيىمدى پايدالانىپ، كاسىپپەن اينالىسۋعا شاقىردى. بۇل تۋرالى وبلىس اكىمىنىڭ باسپا ءسوز قىزمەتىنە سىلتەمە جاساپ قازاقپارات ءتىلشىسى حابارلايدى.

اقتوبە وبلىسىنىڭ اكىمى بەردىبەك ساپاربايەۆ تەمىر اۋدانىنىڭ الەۋمەتتىك- ەكونوميكالىق دامۋىمەن، مەملەكەتتىك باعدارلامالاردىڭ ورىندالۋىمەن تانىسىپ، تۇرعىندارىمەن كەزدەستى. تەمىر قالاسىندا س. بايىشيەۆ اتىنداعى ورتا مەكتەپكە قازىر 400 بالا وقىپ جاتىر. بيىل كۇردەلى جوندەۋ جۇمىستارىنا 17 ميلليون تەڭگە ءبولىنىپ، يگەرىلدى. مەكتەپتەگى فيزيكا، حيميا، بيولوگيا، ينفورماتيكا كابينەتتەرى جابدىقتالىپ، ينتەراكتيۆتى سىنىپتار جۇمىس ىستەپ تۇر.

 وقۋ ورنى «Samruk-Kazyna Trust» قورىنىڭ «مەنىڭ ەلىم» جوباسى اياسىندا قاجەتتى سپورت قۇرالدارىمەن جابدىقتالعان. ءوڭىر باسشىسى ءوز ساپارى كەزىندە 1870 -جىلى سالىنعان شىركەۋدى قالپىنا كەلتىرۋ جۇمىسىمەن تانىستى. بۇل - وبلىستاعى ەڭ كونە عيماراتتاردىڭ ءبىرى، ساۋلەت ەسكەرتكىشى بولىپ تابىلادى.

كەيىن وبلىس اكىمى بەردىبەك ساپاربايەۆ كەڭقياق اۋىلىنا باردى. مۇندا بيىل 250 ورىندى «زەرە» بالاباقشاسى اشىلعان بولاتىن. سونىمەن قاتار 40 ورىنعا ارنالعان حوستەل جۇمىسىن باستادى. اۋىل تۇرعىندارىمەن كەزدەسۋى كەزىندە ءوڭىر باسشىسى حالىقتى كاسىپكەرلىكپەن، اۋىل شارۋاشىلىعىمەن، سونىڭ ىشىندە سۋارمالى ەگىنشىلىكپەن اينالىسۋعا شاقىردى. اۋدانداعى ەلدى مەكەندەردى گازبەن قامتاماسىز ەتۋ، ەڭبەكاقىنى كوتەرۋ جانە جاڭا مادەنيەت ءۇيىن سالۋ ماسەلەلەرى تالقىلاندى. كەزدەسۋ شۇبارشي اۋىلىندا دا ءوتتى.

«اۋىل شارۋاشىلىعى مەن كاسىپكەرلىكتى دامىتۋعا باعىتتالعان مەملەكەتتىك باعدارلامالار بار. كەڭقياق پەن شۇبارشيدا ولار پايدالانىلىپ جاتقان جوق. بۇل باعدارلامالار اۋىلدى جۇمىسپەن قامتۋعا، ازاماتتاردىڭ ءال- اۋقاتىن جاقسارتۋعا زور مۇمكىندىك بەرەدى، تەك نيەت بولسا بولعانى، ەرىنبەي، مەملەكەتتىڭ كومەگىن پايدالانۋ كەرەك»، - دەدى وبلىس اكىمى بەردىبەك ساپاربايەۆ.

كەزدەسۋ كەزىندە اۋىل تۇرعىندارى اۆتوكولىك جولدارىن جوندەۋ، مەديتسينالىق بەكەت پەن سپورت عيماراتتارىن سالۋ بويىنشا ساۋالدارىن قويدى.

اۆتور: التىناي ساعىندىقوۆا