قازاق سايتتارىنىڭ تاقىرىپتارى تاياز - زەرتتەۋ

فورۋمنىڭ ءبىرىنشى سەسسياسىندا «مىنبەر» جۋرناليستەردى قولداۋ قورىنىڭ جەتەكشىسى ەسەنگۇل كاپ قىزى قازاق سايتتارىنىڭ نەگىزگى ماسەلەلەرىن اتاپ ءوتتى.

ونىڭ ايتۋىنشا، قازاق ءتىلدى كەڭىستىكتە قارجى-ەكونوميكالىق ماتەريالدار از. ال سايتتاردىڭ وزدەرى جەڭىل-جەلپى تاقىرىپتاردان شىعا الماي جاتادى.

«قازىر ءبىز قانداي وقىرماندى تاربيەلەپ وتىرمىز؟ ءبىز بۇگىنگى ماڭىزدى ماسەلەلەردى ەمەس، جۇلدىزدار جانە تاعى باسقا سەنساتسيالىق جاڭالىقتى ىزدەيتىن وقىرماندى تاربيەلەپ وتىرعان سياقتىمىز. ءتىپتى، بەس جاستاعى بالانىڭ ءوزى ءانشىنىڭ ءومىرىن بەس ساۋساعىنداي ءبىلىپ وتىرادى. ءبىراق وزىنە قاجەتتى اقپاراتتاردى بىلمەيدى. نەگە؟ ويتكەنى ءبىز ءوزىمىز قاجەتتى اقپاراتتى بەرمەيمىز»، - دەيدى ە. كاپ قىزى.

زەرتتەۋگە سايكەس، سوڭعى جىلدارى قازاق سايتتارىنىڭ سانى ءوستى. الايدا ولاردىڭ اراسىندا باسەكەلەستىك تومەن بولىپ تۇر. سەبەبى سالا-سالا بويىنشا ءبولىنىپ، تۇشىمدى دۇنيەلەردى جاريالاۋ جاعى كەنجەلەپ كەلەدى. قازاق سايتتارى ءبىر-ءبىرىنىڭ اقپاراتتارىن كوشىرىپ باسا سالادى. ءسويتىپ، كونتەنت بىرتەكتى، ال قازاق سايتتارىنىڭ جەكە ىزدەنىسى، جەكە قولتاڭباسى جوق. مۋلتيمەديالىق ونىمدەردى پايدالانۋ كورسەتكىشى دە تومەن.

«تاعى ءبىر ماسەلە ول - تاقىرىپتىڭ تايازدىعى. بۇل - ءبىزدىڭ ءوز قاتەلىگىمىز. ءبىز نەعۇرلىم ساپالى كونتەنت ۇسىنساق، وقىرماننىڭ تالابى دا سوعۇرلىم ارتادى. سوندىقتان تاقىرىپتاردىڭ اياسىن كەڭەيتۋ كەرەك. ءبىزدىڭ بايقاعانىمىز، قازاق سايتتارى كوتەرەتىن بىرنەشە تاقىرىپ بار. ول - الەۋمەتتىك ماسەلەلەر، ءتىل ماسەلەسى جانە ۇلتتىق ماسەلە. وسى تاقىرىپتاردىڭ توڭىرەگىندە كوبىرەك اڭگىمە قوزعايمىز. ال قارجى مەن ەكونوميكا سالاسىنا تەرەڭدەپ ەنە المايمىز. نەگىزى، ونداي تاقىرىپتارعا سۇرانىس جوعارى»، - دەپ اتاپ كورسەتتى ە. كاپ قىزى.

وسى ورايدا قور جەتەكشىسى مەملەكەتتىك تاپسىرىس ماسەلەسىنە دە توقتالدى.

ونىڭ ايتۋىنشا، قازاق سايتتارى مەملەكەتتىك تاپسىرىسقا نەعۇرلىم تاۋەلدى بولسا، تاقىرىپ اياسى سوعۇرلىم تارىلا تۇسەدى.

«مەملەكەتتىك تاپسىرىس بولماسىن دەمەيمىز. تاپسىرىستى الۋ كەرەك. ءبىراق وسى ماسەلەنىڭ باسقا ءبىر جولدارىن قاراستىرۋ قاجەت. ماسەلەن، مەملەكەتتىڭ ىشكى كونتەنتكە ارالاسپاۋى، ىشكى كونتەنتتى باسقارماۋى. ويتكەنى بۇگىندە ءبىز الەۋمەتتىك جەلىلەردەن قالىپ قويىپ وتىرمىز. قوعامدىق پىكىردى قالىپتاستىرۋ جاعىنان بۇقارالىق اقپارات قۇرالدارى ەمەس، الەۋمەتتىك جەلىلەردىڭ ۇلەسى باسىم بولىپ تۇر»، - دەدى جۋرناليست ەسەنگۇل كاپ قىزى.

اۆتور: ارمان اسقاروۆ