تۋىندىدا ومىرشەڭدىكتىڭ ءيىسى اڭقىپ تۇر - باقىتجان جۇماعۇلوۆ ەلباسىنىڭ كىتابى جايلى

استانا. قازاقپارات - نۇرسۇلتان نازاربايەۆتىڭ «تاۋەلسىزدىك ءداۋىرى» كىتابىندا تاۋەلسىز قازاقستاننىڭ تاريحى وتە شىمىر ءارى ناقتى پايىممەن جازىلعان.

ق ر ۇلتتىق عىلىمي اكادەمياسىنىڭ اكادەميگى، سەناتور باقىتجان جۇماعۇلوۆ وسىلاي دەپ ويىن ءبىلدىردى، دەپ حابارلايدى «قازاقپارات» ح ا ا ءتىلشىسى.

«تۋىندى ماعان تەرەڭ اسەر قالدىردى. بۇل وقىرماندى بەي-جاي قالدىرماس اسا ىجداھاتتىلىقپەن جازىلعان كىتاپ. كىتاپتىڭ تاعى ءبىر ەرەكشە قىرىن اتاپ وتكىم كەلەدى. بىرىنشىدەن، مۇندا تاۋەلسىز قازاقستاننىڭ تاريحىن وتە شىمىر ءارى ناقتى پايىممەن جازعان. ەكىنشىدەن، تۋىندىنىڭ ءار جولىندا ومىرشەڭدىكتىڭ ءيىسى اڭقىپ تۇر. ءار جولدا، ءار رەفورمانى بايانداعان كەزدە اۆتوردىڭ ەموتسيونالدىق كوڭىل-كۇيىن سەزىنە الاسىز»، - دەيدى باقىتجان جۇماعۇلوۆ.

اكادەميكتىڭ ايتۋىنا قاراعاندا، سوڭعى 26 جىلدىق تاريحىندا قازاقستاننىڭ دامۋ مەن وركەندەۋىندە، العا وزۋىندا ۇلت كوشباسشىسىنىڭ ەڭبەگى زور.

«ءدال ەلباسىنىڭ اقىل- ويى، ينتەللەكتى مەن كۇش-جىگەرى ەل دامۋىنىڭ قايتالانباس مودەلىن جاساپ بەردى. ەلباسىنىڭ كىتابىن وقىعاننان كەيىن مەنىڭ ەسىمە 2005-2008-جىلدار ارالىعىندا «نۇر وتان» پارتياسىندا بولعان كۇردەلى كەزەڭدەر ەسىمە ورالدى. ويتكەنى، 2005-جىلعى پرەزيدەنتتىك سايلاۋ بۇكىل پارتيا ءۇشىن ءوسۋدىڭ، ساياسي كەمەلدەنۋدىڭ ناعىز سىناعى بولدى. ەلباسى كىتاپتا اتاپ وتكەندەي، ول سايلاۋ 21- عاسىردىڭ باسىنداعى قازاقستانىڭ ىشكى ساياسي ومىرىندەگى ەڭ ماڭىزدى وقيعاعا اينالدى. مەن سول كەزدە ەلباسىنىڭ سايلاۋالدى شتابىن باسقاردىم. تاريحي ساتتەردىڭ باسى- قاسىندا بولدىم. سول ءۇشىن ءوزىمدى باقىتتى سانايمىن. وسى سايلاۋ ەلىمىزدەگى جەتەكشى پارتيانى پارلامەنتتىك ۇلگىدەگى پارتياعا اينالدىرۋدىڭ العاشقى قادامى بولدى»، - دەيدى سەناتور.

باقىتجان جۇماعۇلوۆ سول تۇستاعى تاعى ءبىر ماڭىزدى ماسەلە - 2007-جىلعى كونستيتۋتسيالىق رەفورما ەكەنىن ايتادى. ونىڭ ەڭ باستى جاڭالىقتارىنىڭ ءبىرى - ەلىمىزدەگى پارلامەنت سايلاۋى پروپورتسيونالدى، ياعني تەپە-تەڭدىك سايلاۋ جۇيەسىنە اۋىسۋى.

«وسىلايشا ەلىمىزدەگى ساياسي پارتيالار اشىق باسەكەگە، ەلەكتورالدى پروتسەسكە تولىق قوسىلدى. بۇل دامىعان دەموكتراتيالىق ەلدەرگە ءتان جۇيە ەدى. ءبىز جاڭا جۇيەدەگى پارلامەنتتىك سايلاۋدى ءساتتى وتكىزدىك. وندا ءبىزدىڭ «نۇر وتان» پارتياسى سەنىمدى تۇردە جەڭىسكە جەتتى»، - دەپ ەسكە الدى وتكەندى سەناتور.

باقىتجان جۇماعۇلوۆ مەملەكەت باسشىسىنىڭ باستاماسىمەن عىلىمدى باسقارۋدىڭ جاڭا مودەلى جۇمىس اتقارىپ جاتقانىن تىلگە تيەك ەتتى.

«بۇل قادام زەرتتەۋشىلەردىڭ جىگەرىن جانىپ، ينتۋزيازمىن بىردەن كوتەردى. كەلەشەكتە عىلىمنىڭ ونىمدەرىن كوممەرتسيالاندىرۋ باعىتىنا باسا ماڭىز بەرىلەدى. بۇنىڭ ارتىندا البەتتە، زور بولاشاق تۇر. وسىنىڭ بارلىعى جاڭا كىتاپتا قامتىلعان»، - دەپ ءتۇيدى ول.

ەسكە سالا كەتسەك، استانادا نۇرسۇلتان نازاربايەۆتىڭ «تاۋەلسىزدىك ءداۋىرى» اتتى جاڭا كىتابىنىڭ سالتاناتتى تۇساۋكەسەرى بولىپ ءوتتى. تاريحي پۋبليتسيستيكا جانرىندا جازىلعان، قازاق جانە ورىس تىلدەرىندە باسىلعان ەلباسىنىڭ بۇل ەڭبەگى ەلىمىزدىڭ جاڭا تاريحى مەن ونىڭ ەرتەڭىنە دەگەن اۆتوردىڭ كوزقاراسىن تانىتادى.

اۆتور: ايان بەكەن ۇلى