ۇكىمەت «سيفرلىق قازاقستان» مەملەكەتتىك باعدارلاماسىن بەكىتتى
بۇل تۋرالى اقپارات جانە كوممۋنيكاتسيالار مينيسترلىگىنىڭ باسپا ءسوز قىزمەتى حابارلايدى.
باعدارلامانىڭ باستى ماقساتى - سيفرلىق تەحنولوگيالاردى پايدالانۋ مەن دامىتۋ ارقىلى مەملەكەت ەكونوميكاسىنىڭ باسەكەلەستىگىن جانە حالىق ءومىرىنىڭ ساپاسىن ارتتىرۋ.
جوبانى جۇزەگە اسىرۋ ەكى جولمەن جاسالادى دەپ جوسپارلانۋدا. ولار: ورتاشا مەرزىمدى كەلەشەكتە «قازىرگى ەكونوميكانى سيفرلاندىرۋ» جانە ۇزاق مەرزىمدى كەلەشەكتە «بولاشاقتىڭ سيفرلىق يندۋسترياسىن قۇرۋ».
باعدارلاما اياسىندا جوسپارلانعان 120 ءىس-شارا سيفرلىك سالانىڭ ەكونوميكانىڭ جاڭا سالاسى رەتىندە ىرگەتاسىن قالاپ، باستى بەس باعىت بويىنشا جۇزەگە اسىرىلاتىن بولادى. ولار: «ەكونوميكا سالالارىن سيفرلاندىرۋ»، «سيفرلىق مەملەكەتكە كوشۋ»، «سيفرلىق جىبەك جولىن ىسكە اسىرۋ»، «ادامي كاپيتالدى دامىتۋ»، «يننوۆاتسيالىق ەكوجۇيەنى قۇرۋ».
باعدارلاما اياسىنداعى ءىس-شارالار ناتيجەسىندە ەكونوميكا سالالارىنداعى ەڭبەك كورسەتكىشتەرىنىڭ وسىمىنەن بولەك، 2022-جىلعا دەيىن ەلەكتروندىق ساۋدا-ساتتىقتى جالپى ساۋدا-ساتتىق كولەمىنىڭ %2,6 دەيىن ءوسىرۋ، سيفرلاندىرۋ ارقاسىندا 300000 جاڭا جۇمىس ورىندارىن اشۋ، ينتەرنەت جەلىسىن پايدالانۋشىلار ۇلەسىن %82 دەيىن، ال حالىقتىڭ سيفرلىق بىلىمدىلىگىن %83 ارتتىرۋ جوسپارلانۋدا.
«سيفرلىق قازاقستان» ادام ءومىرىنىڭ بارلىق سالالارىن قامتي وتىرىپ، مەملەكەتىمىزدىڭ ءاربىر تۇرعىنىنىڭ ءومىر دەڭگەيىن جوعارىلاتۋدى كوزدەگەندىكتەن باعدارلاما پايداسىن حالىق، كاسىپكەرلىك سۋبەكتىلەرى جانە قازاقستان رەسپۋبليكاسىنىڭ مەملەكەتتىك ورگاندارى كورەدى. الدىن-الا بەلگىلى بولعان ەسەپتەۋ بويىنشا 2025-جىلعا قاراي ەكونوميكانى سيفرلاندىرۋدان بولاتىن تىكەلەي اسەر 1,7 - 2,2 تريلليون تەڭگە كولەمىندە قوسىمشا باعا جاساۋعا مۇمكىندىك بەرەدى.
باعدارلامانى جۇزەگە اسىرۋ مەملەكەت باسشىسىنىڭ «قازاقستان-2050» ستراتەگياسىندا العا قويعان باسەكەلەستىگى جوعارى 30 مەملەكەت قاتارىنا 2050-جىلعا قاراي ەنۋىنە جول اشاتىن باستى فاكتور بولۋى مۇمكىن.
