شىعىس يەرۋساليمدى پالەستينا استاناسى دەپ مويىنداۋ تۋرالى ورتاق دەكلاراتسيا قابىلداندى
استانا. قازاقپارات - ىستامبۇلدا وتكەن يسلام ىنتىماقتاستىق ۇيىمىنىڭ كەزەكتەن تىس سامميتىنىڭ قورىتىندىسى جاريالاندى.
وعان سايكەس، ۇيىمعا مۇشە مەملەكەتتەر شىعىس يەرۋساليمدى پالەستينا استاناسى دەپ مويىنداۋ تۋرالى ورتاق دەكلاراتسيا قابىلدادى.
القالى جيىننىڭ ناتيجەلەرىن تۇيىندەگەن تۇركيا پرەزيدەنتى ا ق ش- تىڭ تاياۋ شىعىس ايماعىنداعى ساياساتىن قاتاڭ سىناپ، ونىڭ اراب- يزرايل بەيبىتشىلىك ۇدەرىستەگى ءرولىن جوققا شىعاردى.
ەستەرىڭىزگە سالامىز، يسلام ىنتىماقتاستىق ۇيىمىنىڭ ىستامبۇلداعى كەزەكتەن تىس سامميتىنە 49 ەلدىڭ مەملەكەت باسشىلارى، ۇكىمەت جەتەكشىلەرى مەن لاۋازىمدى تۇلعالارى جينالدى. ال ەلىمىزدىڭ اتىنان بۇل جيىنعا سەنات ءتوراعاسى قاسىم- جومارت توقايەۆ پەن سىرتقى ىستەر ءمينيسترى قايرات ءابدىراحمانوۆ قاتىستى.
رەدجەپ تايىپ ەردوعان، تۇركيا رەسپۋبليكاسىنىڭ پرەزيدەنتى:
- وسىدان سوڭ امەريكا يزرايل- پالەستينا اراسىندا اراعايىندىق جاساي المايدى. بۇل ءۇردىس وسى جەردە اياقتالدى. ال اراعايىندىق ءرولدى كىم اتقارۋى مۇمكىن، يسلام ىنتىماقتاستىق ۇيىمىنىڭ اياسىندا ونى قاراستىرۋىمىز ءتيىس. ۇيىمنىڭ بۇگىنگى سامميتىندە ا ق ش- تىڭ ارانداتۋشىلىق ارەكەتى اشكەرە بولدى. بۇل قاتەلىكتى تەرىستەۋ ەشكىمگە پايدا بەرمەيدى. ءبىز بۇگىن يەرۋساليمدى پالەستينانىڭ استاناسى رەتىندە جاريالاپ، تاريحي شەشىم قابىلدادىق.
www.24.kz
