پەتروپاۆل قالاسىندا تەز پىسەتىن كەسپە شىعارىلا باستادى

 ايداربەك ايتمۇحامبەت ۇلى:

- ەرەكشەلىگى سول، قازىر قازاقستانداعى كەسپەلەردىڭ بارلىعى قولمەن جاسالادى. ال وسىندا ول وزىق قوندىرعى، تىڭ تەحنولوگيامەن عانا دايىندالادى. بۇل كاسىپورىننىڭ ەۋرازيالىق ەكونوميكالىق وداق كەڭىستىگىندەگى باسەكەلەستىگىن ارتتىرادى.

پەتروپاۆلداعى تەز دايىندالاتىن تاعامدار كەشەنى بىلتىر اشىلعان ەدى. ەندى مۇندا قۇرعاق تاڭعى اس، جۇگەرى تاياقشالارى، قاۋىزدارمەن قاتار كەسپە دە شىعارىلادى. بۇل -  كاسىپكەرلىكتى قولداۋ كارتاسىنىڭ جوباسى. قۇنى -  1 ميلليارد 400 ميلليون تەڭگە. قارجىنىڭ ءبىر بولىگى «بيزنەستىڭ جول كارتاسى -  2020» باعدارلاماسى بويىنشا ءبولىندى.

 جاڭا جەلى جىلىنا 15 مىڭ توننا ءونىم وندىرەدى. ونىڭ تەڭ جارتىسى كورشى رەسەي ەلىنە ەكسپورتتالادى. ىسكەر ازامات ءبىر ەمەس، بىرنەشە ءوندىرىستى قاتار الىپ، جەكە يندۋستريالدى ايماق قۇرماق.

 قۇمار اقساقالوۆ، سولتۇستىك قازاقستان وبلىسىنىڭ اكىمى:

- زاۋىتتىڭ جانىنان جاڭا جەكە يندۋستريالدى ساياباق اشپاقشىمىز. وندا 14 جاڭا ءوندىرىس اشىلادى. جوباعا تارتىلاتىن ينۆەستيتسيا كولەمى 10 ميلليارد تەڭگەدەن اسادى. سوندىقتان وبلىستىڭ ەكونوميكالىق دامۋىنا ول وڭ اسەر ەتەدى. جاڭا جەلىدە 60 ادام جۇمىس ىستەيدى. جالپى سولتۇستىك قازاقستان وبلىسىندا يندۋستريالدى- يننوۆاتسيالىق دامۋ باعدارلاماسىنىڭ ەكىنشى بەسجىلدىعىندا 25 جوبا جۇزەگە استى.

www.24.kz